Pak kohë më parë ju kemi folur për një çift shqiptarësh, të cilët edhe pse shumë të rinj në moshë, na bënë të ndihemi krenarë me krijimin e tyre. Bëhet fjalë për Jola Hasimin dhe Nertil Boraj, dy artistët që i dhanë jetë parfumit “Shqipëria ime”. Këtë herë ata kanë përfaqësuar punën e tyre në një nga festivalet më të mëdha të filmit në Cannes të Francës, jo më vetëm nëpërmjet parfumit, por edhe në fushën e modës.
E kontaktuar nga redaksia e tesheshi.com, Jola tregon se falë kompanisë amerikane që menaxhon kompaninë e tyre, mësuan rreth eventit që do të organizohej ditën e mbylljes së festivalit.
“Bëhej fjalë për një konkurs prej të cilit do të zgjidheshin 10 stilistët e rinj nga e gjithë bota për të prezantuar krijimet e tyre. Kushti i vetëm ishte që çdo gjë duhet te ishte Haute-couture! Para gjashtë muajsh jemi konfirmuar si një ndër 10 pjesëmarrësit. Juria ka zgjedhur pjesët më të bukura të koleksionit të parë “Empire-JOLA HASIMI- florence” për të sfiluar atë mbrëmje dhe njëkohësisht i ka dedikuar një hapësirë të konsiderueshme kohore prezantimit të parfumit “Shqipëria ime””, – rrëfen Jola modestisht.
Ajo na bën të ditur se veshjet janë të dizenjuara nga ajo dhe Nertili, duke qenë se marka “JOLA HASIMI-florence” është markë stilistësh dhe natyrisht, pak nga pak po zgjerohet duke prodhuar çdo gjë në fushën e modës.
Evenimenti u zhvillua në hollin e hotelit “Majestic”, ku deri në atë moment ishte dhe pika e qëndrimit të artisteve të festivalit, të cilët ishin të pranishëm si në spektakël edhe në after party, por nuk mungonin as stilistë të mëdhenj, editorë mode, bloger, misse etj.
Siç tregon Jola, koleksioni u prit më së miri dhe parfumi jo më pak. Ajo thotë se çdo stilist është dy vite para në kohë, ndaj koleksioni “Empire” ka kohë që punohej.
Artistja e re shqiptare thekson se veshjet nuk janë aspak në promovim të parfumit, përkundrazi është ndërthurja e çdo elementi që marka “JH” prodhon: veshje me cilësi të lartë, kozmetikë, aksesorë etj.
Revista “Fashion couture” dhe “Artes” i kanë dedikuar hapësirën përkatëse koleksionit “Empire” të veshjeve. Eventi i organizuar u transmetua live në 12 televizione mode dhe jo vetëm, ndërkohë që për pak kohë pritet të publikohen edhe videot e intervistat që stilistët e rinj kanë dhënë.
“Modelet e zgjedhur për koleksionin tonë vinin posaçërisht nga Parisi dhe prezantimin e gjatë të markës “JOLA HASIMI _florence” dhe rrjedhimisht përshkrimin në detaj të parfumit Shqipëria ime është bërë nga miss Cannes, Estelle Viripinte dhe aktorja dhe këngëtarja e njohur ( kandidate edhe këtë vit në festivalin e Cannes) Aurelia Khazan.
Jola nuk kursehet as të na japë detaje në lidhje me veshjet e stiluara nga ajo. “Veshjet janë përzgjedhur për mënyrë konstruktive, nëpërmjet punimit në disa shtresa të brendshme enkas për të mbuluar çdo defekt të trupit. Çdo gjë është e realizuar me dorë dhe çmimet fillojnë nga 1600€ duke përmbyllur me 5500 € pjesën më të shtrenjtë në këto veshje që u prezantuan në Cannes”, – tregon stilistja shqiptare.
E siç e thotë edhe Jola, Cannes ishte vetëm fillimi sepse evenimentet në vazhdim janë ende më të mëdha, ndërsa marka “JOLA HASIMI _florence” synon tregun botëror ku tanimë janë hedhur edhe hapat e para. /tesheshi.com/
