Baronesha me prejardhje boshnjake dhe njëra nga shtatë baroneshat e vetme të Dhomës së Lordëve, po konsiderohet si iniciatorja e rezolutës për gjenocidin e Srebrenicës, e cila pritet të sillet për votim në KS të OKB-së, së shpejti. Nëse ajo miratohet, vaj halli për Serbinë.
Heliç di shumë për Bosnjën dhe Ballkanin, ndërsa ka këshilluar William Haguen, kur ky ka qenë ministër i jashtëm dhe kur është marrë me rajonin tonë. Ajo i ka dhënë shumë leksione edhe Angelina Jole-it kur kjo e bëri filmin e saj për luftën e Bosnjës. Për krejt këto, Heliç po llogaritet si gruaja e cila është duke e tmerruar Serbinë.
Dhe nuk janë vetëm bisedimet e vështira me Prishtinën në Bruksel që do të mbahen nesër, e ku Beogradit pritet t’i kërkohet të lëshojë pe në shumë gjëra gjatë bisedimeve.
Ndoshta më e rëndë se çështja e Kosovës, për Serbinë llogaritet të jetë rezoluta për gjenocidin e Srebrenicës të shkaktuar nga ushtria e ish-Jugosllavisë, e që pritet të sillet në Këshillin e Sigurimit të OKB-së, nga Britania e Madhe, së shpejti.
Nëse kjo rezolutë kalon, atëherë Serbia dhe serbët do të identifikohen si shteti dhe kombi që kryen gjenocid, duke e bërë veten epiqendër të imazhit më të keq të mundshëm ndërkombëtar, për shkak të autorësisë së krimeve më të rënda të mundshme të luftës, ndaj boshnjakëve myslimanë.
Iniciatore e rezolutës për gjenocid mendohet të jetë një autore e fshehtë, emri i të cilës nuk u bë i ditur deri dje. E këtë si duket e zbuloi Newsweek e Beogradit, e cila pretendon se e gjeti atë. Bëhet fjalë për Arminka Heliç pra, një baroneshë misterioze me prejardhje boshnjake, njofton Klan Kosova. Ajo është vetëm njëra nga gjithsej shtatë femrat në dhomën e lordëve të parlamentit britanik.
Ajo besohet se pati ndikim të madh pse Londra vendosi ta propozojë rezolutën për gjenocid të Srebrenicës.
Heliç ka njohuri të shumta për luftën e Bosnjës dhe masakrën e Srebrenicës, duke qenë se ka qenë e përfshirë në disa forma në këtë luftë. Për shkak të njohurive të saj, ajo, më 1998, u angazhua nga konservativët si eksperte e Ballkanit. Më vonë arriti të shndërrohet në “njërën nga ekspertët me impresivë të politikës së jashtme në qeveri”.
Për shkak të angazhimit të madh, por diskret, kryeministri David Cameron e nominoi atë për Dhomën e Lordëve.
Më 2014 Heliç u emërua baroneshë (pa të drejtë trashëgimie familjare), nga mbretëresha Elizabetë, për shërbimet e shumta ndaj mbretërisë. Kjo i mundësoi asaj që me 24 nëntor 2014 të bëhet pjesë e Dhomës së Lordëve, si e treta femër myslimane që mbërrin këtu nga kampi konservativ.
Ajo njihet edhe si bashkëpunëtore e ngushtë e aktores Angelina Jolie. Kjo e fundit, që bëri edhe film për luftën e Bosnjës, e ka quajtur Heliçin si mentore të saj, duke qenë se i ndihmoi shumë për ta kuptuar situatën në Bosnjë. /tesheshi.com/
