Një kryetar bashkie në një qytet të vogël të Francës është zotuar të mos lejojë hapjen e mëtejshme të lokaleve që tregtojnë kebab, duke e parë këtë si një kërcënim për traditat historike franceze.
Gjatë transmetimit javën e shkuar të programit Envoyé Spécial në kanalin televiziv France 2, Robert Menard, kryetari i bashkisë së Bezjesë (Beziers) në jug të Francës, deklaroi se do t’i kundërvihej hapjes së më shumë lokaleve të tilla.
“Ne jemi një vend me traditë judeo-kristiane. Eshtë e vështirë për ca, por duhet ta bëjmë këtë,” tha shkoqur Menard.
Një ish-gazetar, sjellja e Menard-it nuk duket e çuditshme kur mëson se ai u zgjodh vitin e shkuar si kryetar bashkie me ndihmën e Frontit Nacional, partisë së djathtë ekstreme.
“Unë nuk do ta lë Bezjenë të bëhet kryeqytet i kebabit,” do të paralajmëronte kryetari i bashkisë së qytetit.
E çuditshme është se në tërë zonën ku qeveris Menard-i vetëm pesë për qind e zënë lokalet që shërbejnë kebab, me dy të tretat e restoranteve të mbizotëruara nga ushqimi francez.
Një vit më parë do të ishte vetë Fronti Nacional që në fushatën elektorale për zgjedhjet lokale do ta kritikonte ashpër dukurinë e hapjes së restoranteve që shërbenin kebab, duke i fajësuar ato për dëmtim të kulturës autentike franceze. Fronti Nacional do ta përshkruante fenomenin si “kebabizim” të Francës.
Robert Menard ka shprehur gjithashtu pakënaqësinë dhe për numrin e madh të emigrantëve në Francë, duke i vënë në një plan ata me lokalet e kebabit.
“Shumë është shumë. Kur ka shumë emigrantë në një vend, ka shumë emigrantë. Në sektorin e ushqimit, në fushën e restoranteve, unë shoh aq shumë kebabë.”
“Këto biznese nuk kanë të bëjnë aspak me kulturën tonë!”, do t’i vinte pikën ai çështjes teksa shkruante në Twitter.
Në vetëm pak kohë si kryetar i bashkisë së Bezjesë, Menard është akuzuar për kthim të qytetit në një laborator të së djathtës ekstreme. /tesheshi.com/
