Lulzim Basha ka zgjedhur një rrugë krejt të ndryshme nga shpikësi i mosbindjes civile që ta implementojë atë në Shqipëri.
“Të ngrihemi e të frymëzojmë anembanë vendin përmes akteve të mosbindjes civile e të qëndresës, hapjen e një rruge të re për Shqipërinë”, tha Basha në një takim në Kukës.
Mosbindja civile është motamo lëvizja e liderit indian, Mahatma Gandhi, i cili implementoi një rezistencë paqësore, por të vendosur ndaj pushtuesit britanik.
Gandi u tha ndjekësve të tij që të mos shesin asnjë gram kripë në Angli, një mall shumë i kërkuar; të bojkotojnë të gjitha mallrat anglezë, të vishen si indianë dhe jo si londinezë, të mos paguajnë taksat e Mbretëreshës, etj etj.
Kjo metodë pati sukses pasi kemi të bëjmë me një situatë koloniale ku trupat pushtuese e panë veten të bllokuar dhe s`mund të vazhdonin më tej.
Ata vendosën të largohen nga India dhe kështu u shpall pavarësia. Kjo metodë u përdor edhe në Kosovë nga Ibrahim Rugova.
Presidenti i ndjerë shpalli struktura paralele, si: qeveri, dikastere, shkolla, institucione kulturore, të cilat zhvilloheshin jo në amblentet publike por në ato private, duke mos njohur kështu autoritetin e Serbisë mbi Kosovën.
Ndërsa mosbindja civile e Bashës në fakt, bëhet në një vend ku opozita është palë kryesore e shtetit në Parlament, vetëm se nuk administron, por kundërshton propozon dhe voton.
Një mosbindje civile e propozuar nga Basha çfarë është: të mos paguash taksat, dritat, tarifat, shkurt të mos njohësh shtetin. Këtë shtet që e ka administruar kjo opozitë madje edhe lideri i saj.
Si mund të përkthehet mosbindja civile politikisht, si qëndresë apo si bojkot?!
Nëse ndodh e para, duhet të kemi aksione si Vetëvendosja, pra bllokim të veprimit të funksionimit të shtetit, ndërsa nëse ndodh e dyta bojkotohet Kuvendi, shpallet grevë e përgjithshme me kërkesa të posaçme politike.
Por kjo nuk është mosbindje civile, por aksion politik agresiv, që synon një gjë: ardhjen në pushtet me zgjedhje të lira, të parakohshme apo të radhës.
Ama nuk e ka emrin mosbindje civile!
/tesheshi.com/
