Arkivi Shqiptar ka kujtuar Kongresin e Gruas komuniste në nëntor të ’44-ës, me protagoniste Nexhmije Hoxhën.
“Më 4 nëntor 1944, u mbajt në Berat Kongresi i I-rë i Bashkimit të Gruas Antifashiste Shqiptare (BGASH).
BGASH-ja ishte një organizatë politike-shoqërore që u krijua në vitet e Luftës Antifashiste Nacionalçlirimtare, në bazë të vendimeve të Konferencës së I-rë të Partisë Komuniste Shqiptare (PKSH). Atëkohë, u krijua në Tiranë një Komision nismëtar, në krye të të cilit Komiteti Qendror caktoi Nexhmije Xhuglinin (Hoxhën).
Në Kongresin e II-të të BGASH-së, që u mblodh në Tiranë më 30.6.1946, u vendos që organizata të merrte emrin ‘Bashkimi i Grave të Shqipërisë’. Organi i saj më i lartë ishte Kongresi. Ndërsa, Këshilli i Përgjithshëm shërbeu si organ drejtues në periudhën midis dy kongreseve. Këshilli zgjidhte Kryesinë, nga dilte dhe Sekretariati i Këshillit të Përgjithshëm.
Disa prej drejtueseve që pasuan Hoxhën në krye të BGSH-së qenë Vito Kapo, Ollga Plumbi e Lumturi Hexha. Naunka Bozo, Eleni Selenica, Nefo Myftiu, Ela Gjikondi, Liri Tashko etj, bënin pjesë në radhët e aktivisteve më të spikatura”, shkruan Arkivi.
Por kujtojmë gjithshtu se kësaj ngjarjeje të nëntorit të fundit të luftës, Kinostudioja do i kushtonte një film, “Rruga e Lirisë”.
Në rolin e Nexhmije Hoxhës aty, jo e thënë por e nënkuptuar, është Roza Anagnosti, e cila arrin të joshë dhe gra malësore për t’u angazhuar me luftën krah nacionalçlirimtares komuniste. Sipas fabulës së filmit, ata sfidojnë dhe burrat e ashpër madje duke iu bashkua idealit. /tesheshi.com/
