Javën e kaluar, arkeologët egjiptianë gjatë gërmimeve arkeologjike që kanë bërë kanë zbuluar 10 varre mbretërore të lashta dhe madje disa, sipas njoftimit të bërë, kanë pasur brenda edhe mumje.
Krahas këtyre zbulimeve shumë të rëndësishme, Mahmoud Afifi, kreu i sektorit egjiptian të antikiteteve të lashta pranë Ministrisë së Antikiteteve, ka njoftuar edhe për gjetjen e një varri që i përket periudhës helenistike në zonën El Shatby, një zonë kjo që ndodhet në Aleksandri.
Për më tepër u gjetën mbi 300 artefakte përfshirë enët e qeramikës, një statujë terrakote si dhe kandile qeramike brenda saj.(Periudha helenistike i referohet kohës së historisë së lashtë greke dhe historisë mesdhetare midis periudhës së vdekjes së Aleksandrit të Madh në vitin 323 pes dhe shfaqjes së Perandorisë Romake në vitin 31 p.e.s.
Kjo bën që varri të datohet të paktën me 2.500 vite vjetërsi). Mustafa Rushdi, Drejtori i Përgjithshëm i Antikiteteve të Deltës Perëndimore dhe Aleksandrisë, ka shpjeguar se varri ishte datuar duke u bazuar në stilin e tij arkitekturor dhe periudhen e mbetjeve të qeramikës që gjendeshin brenda tij.
Ai ka bërë me dije se varri i zbuluar përbëhet nga katër salla, secila prej tyre është e dekoruar me elementë dekorative varrimi shumëngjyrëshe dhe shkrime në greqishten e lashtë që sillnin fraza funerale, thuhet në njoftimin zyrtar. Gjatë sezonit të ardhshëm arkeologjik, misioni do të studiojë frazat funerale për të identifikuar pronarët e varreve. /tesheshi.com/
