Këtë herë Aleksis Ciprasin e vë në qendër të vëmendjes nëna e tij, Aristia, e cila ka pranuar të flasë për të përjavshmen Parapolitika.
Ajo e ka përshkruar të birin me nota të zymta, si një njeri të mbërthyer në punë, e që për pasojë ha pak e fle po pak.
“Aleksis kohët e fundit nuk ha, nuk fle, por nuk ka zgjidhje. Ai i ka borxh popullit që i besoi,” u shpreh ajo për të përjavshmen.
“Rrallë e shoh atë. Ai shkon nga aeroporti drejt e në parlament. Ai nuk ka kohë t’i shohë fëmijët e tij, e si mund të më shohë mua,” e shfajësoi Aristi Cipras të birin.
Nëna e kryeministrit e pranoi se që nga referendumi i biri gjendej nën një presion të jashtëzakonshëm. “Nuk kam fjetur tre ditë duke menduar për të. Mendja ime është vazhdimisht te Aleksis. Ai mban në kurriz të gjithë peshën e vendit.”
Ajo vijon të tregojë, “Kur flasim, i them të bëjë më të mirën për vendin, e të kujdeset për veten. Ai më thotë të mos shqetësohem, dhe se gjithçka do të shkojë mirë.”
Miratimi i paketës së re të shpëtimit, që parashikon masa të reja kufizuese, e ka vënë Ciprasin në një pozitë të vështirë, duke i kthyer dhe një pjesë të mirë të anëtarëve të partisë së tij në kundërshtarë të politikave të qeverisë. Vetë fati i kryeministrit grek është ende në udhëkryq, teksa ka zëra se ai i ka ditët e numëruara në krye të ekzekutivit. /tesheshi.com/
