Skuadra argjentinase nuk e fiton Kupën e Amerikës që nga viti 1993, e veç kësaj, në dy finalet e fundit, në 2015-tën dhe në 2016-tën, ka humbur me 11-metërsha ndaj të njëjtit kundërshtar, Kilit.
Kili dhe Argjentina u takua edhe një herë tjetër në finalen e Kupës së Amerikës, të luajtur në orët e para të së hënës.
90 minutat u karakterizuan nga një lojë e ashpër, me shumë kartona. Kiliani Diaz do të nxirrej jashtë në minutën e 28-të me karton të kuq, e po kështu do të ndodhte me argjentinasin Rojo dy minuta para mbylljes së pjesës së parë.
Rezultati i bardhë do t’i çonte finalistët në shtesë, ku Argjentina do të ngulmonte më shumë në kërkim të golit, duke mos dashur të shkohej te gjuajtja e 11-metërshave.
Megjithatë, kur përpjekjet nuk dhanë rezultat, edhe pse Messi posaçërisht u mundua fort të jepte më të mirën e të shënonte ai apo dikush tjetër nga shokët e skuadrës, nuk mbeti alternativë tjetër veç penalltive.
Fitues kishte dalë Kili në të njëjtën situatë vitin e shkuar. Dhe u duk se era fryu në drejtimin e duhur për Argjentinën kur Romero priti goditjen e Vidal-it. Por menjëherë më pas gabon Messi, që e nxjerr topin jashtë. Kilianët nuk gabojnë në katër goditjet e tjera, kurse për argjentinasit është Biglia që po ashtu dështon të shënojë. Gjuajtjen e tij e pret mjeshtërisht Bravo.
Rezultati 4-2 i penalltive e bën rishtas Kilin fitues. Dy trofe të Kupës së Amerikës të fituar nga kilianët, të dyja të siguruar në dy vite të njëpasnjëshme, e ndaj të njëjtit kundërshtar.
Argjentina humbet kështu në tre finale gjatë tre vite, në 2014-tën në Kupën e Botës, dhe në dy vitet pasuese në Kupën e Amerikës.
“Për mua, ekipi kombëtar ka marrë fund,” deklaron Messi pas ndeshjes, duke lajmëruar dorëheqjen nga përfaqësuesja. “Kam bërë gjithçka që mundem; lëndon të mos jesh një kampion,” ka shtuar ai.
Messi ka fituar gjithçka me Barcelonën, por në arenën ndërkombëtare, 29-vjeçari ka vetëm një sukses, medaljen e artë në Lojërat Olimpike të 2008-ës.
Ai do të ishte pjesë po ashtu e Argjentinës humbëse në finalen e Kupës së Amerikës në vitin 2007, ndaj Brazilit.
“Kanë qenë katër finale, u përpoqa. Ishte gjëja që e doja më shumë, por nuk munda ta arrija, kështu që mendoja se ka marrë fund,” do të thoshte ai. /tesheshi.com/
