Arabia Saudite ka lejuar besimtarë nga jashtë që të vijnë për të kryer ritet në Mekë e Medine, siç është Umreja, një nënkategori adhurimi e Haxhit, e kjo pas një pauze shtatë-mujore për shkak të pandemisë COVID.
Masa është pjesë e vendimit të Arabisë Saudite për të lehtësuar kufizimet në parandalimin e përhapjes së virusit. Si pjesë e masave të reja, 20,000 adhurues do të jenë në gjendje të kryejnë ritualin çdo ditë në Xhaminë e Madhe, ku ndodhet Ka’ba, njoftoi media shtetërore Al-Ekhbariya.
Më 4 tetor, autoritetet saudite lejuan sauditët dhe të huajt në Mbretëri të kryenin lutje në Xhaminë e Madhe me kapacitet 30 përqind, ose rreth 6,000 njerëz në ditë.
Më 18 tetor, Mbretëria lejoi 15,000 besimtarë në ditë të kryenin Umre dhe lutje në Al-Masjid al-Nabawa, ose Xhamia e Profetit, në Medine.
Gjatë pandemisë këtë vit, Haxhi ishte i kufizuar në njerëzit që jetonin në Arabinë Saudite.
Arabia Saudite deri më tani ka konfirmuar 347,282 raste të infeksionit me koronavirus, duke përfshirë 5,402 vdekje që kur rasti i parë i infeksionit në Mbretëri u konfirmua në mars. /tesheshi.com/
