Trazirat politike në Prishtinë, po e japin efektin e tyre dhe në veri të Kosovës. Të pabindur ndaj shtetit të Kosovës, sfidues të hapur të institucioneve, ata sot dhe janë rebeluar duke treguar dhëmbët: ministrit të Financave, Abdullah Hotit, i kanë “ngritur traun”, duke mos e lejuar që të vizitojë për inspektim dy pikat kufitare në Veri, G1 në Jarinje të Leposaviqit dhe në G31 në Bërnjak të Zubin Potokut. Ata kanë bllokuar rrugët të dy magjistralet e Veriut.
Dhe, sipas shpjegimit të dhënë nga z/drejtori i Policisë së Kosovës për Veriun, Besim Hoti, i cili e ka konfirmuar këtë fakt, protesta e tyre është ndërmarrë me pretendimin se nuk po implementohet Marrëveshja e Brukselit për krijimin e Asocacionit të Komunave serbe, pra Zajednica e famshme.
Dhe Hoti ka shtuar se për shkak të protestës së serbëve, Policia e Kosovës ka marrë një vendim që për shkaqe sigurie të mos e dërgojë ministrin e Financave, z.Abdullah Hoti në pikëkalimin kufitar në Jarinje të Leposaviqit, por që kjo të lihet për një ditë tjetër.
Është përfolur gjithashtu se është bllokuar edhe kryeinspektori i Ministrisë së Tregtisë dhe Industrisë, Lulzim Syla i cili bashku inspektorë të tjerë, të cilët kanë qenë duke kryer kontrolle të cilësisë së naftës që është duke u futur në Kosovë. Por kjo është përgënjeshtruar nga numri 2 i Policisë, Besim Hoti.
E dhëna tjetër është se grupin e serbëve që kanë bllokuar rrugën në Rudare është duke e udhëhequr kapoja i krimit për veriun e Kosovës, Millan Radonjqi së bashku me kryetarin e Komunës paralele serbe të veriut të Mitrovicës dhe Zveçanit, Aleksandar Spiriq e Ivan Teodosijeviq. /tesheshi.com/
