BE dhe SHBA i kanë dalë krah Ramës dhe për të ashtuquajturin paketë “Anti-KÇK”, duke zgjedhur të shprehën disa javë pas prezantimit të saj, e dy ditë pas miratimit në qeveri.
BE e sheh këtë si aplikim të metodë së sukseshme “Ndiq paranë”, të cilën për koiçidencë, ambasadori Soreca e ka aplikuar vetë si prokuror anti-mafia e anti-krim në Itali.
“‘Ndiq paratë’ ka provuar se është një mënyrë shumë e efektshme për të luftuar konkretisht organizatat kriminale. Ligji special i miratuar nga qeveria e Shqipërisë që prezanton masa të reja parandaluese për forcimin e luftës kundër krimit të organizuar dhe terrorizmit, shkon në këtë drejtim dhe tregon vullnet politik për të trajtuar këtë problem.
Është jashtëzakonisht e rëndësishme që masat e reja ligjore të zbatohen në respekt të plotë të të drejtave themelore të të akuzuarve dhe në përputhje me parimet e shtetit të së drejtës. Është gjithashtu e rëndësishme që këto masa të reja të ndiqen përmes institucioneve të krijuara nga reforma në drejtësi, në veçanti SPAK-un. Ne vazhdojmë ta inkurajojmë qeverinë e Shqipërisë që të rrisë më tej përpjekjet e saj për zbatimin e plotë të reformës në drejtësi dhe forcimin e shtetit të së drejtës”, thuhet në deklaratën e ambasadorit Soreca.
E njëjta frymë mbështetjeje vjen dhe nga ambasada amerikane.
“Ndërsa vazhdon zbatimi i reformave të rëndësishme të drejtësisë, Shtetet e Bashkuara mirëpresin përpjekjet e intensifikuara nga qeveria e Shqipërisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor. Mekanizmat e përforcuar për zbatimin e ligjit duhet edhe të mbështesin institucionet e reja të drejtësisë të ngarkuara me ndjekjen penale të krimit të organizuar, edhe të harmonizohen me standardet e procesit të drejtë ligjor. Ne do të vazhdojmë ta ndjekim zbatimin e këtij ligji me interes të madh”, thuhet në deklaratën e përfaqësisë së Uashingtonit në Tiranë.
Kështu, opozita që e kundërshtoi fort, kësaj here nuk pati me vete ndërkombëtarët. /tesheshi.com/
