Suedia mund të dërgojë kriminelë për të vuajtur dënimet e tyre në burgjet jashtë vendit, ka thënë një komitet i emëruar nga qeveria, ndërsa vendi përpiqet të menaxhojë një rritje të popullatës së burgjeve të shkaktuar nga një valë krimesh të lidhura me bandat.
“Është e nevojshme të punohet për zgjidhje të reja me Shërbimin e Burgjeve”, tha ministri i Drejtësisë Gunnar Strömer në një konferencë për shtyp, duke shtuar se Suedia tashmë është në bisedime me vendet e tjera për të marrë me qira hapësirë në burgjet e tyre.
Krimet e kryera nga bandat janë rritur ndjeshëm gjatë dy dekadave të fundit në Suedi. Ky vend skandinav ka krimet më të larta me armë vdekjeprurëse për frymë në Evropë.
E pajisur me mjete të reja ligjore dhe rritje të stafit dhe financimit, policia suedeze ka bërë përparim kundër bandave – dy vitet e fundit ka pasur më pak të shtëna me armë zjarri dhe më shumë dënime.
Ndërsa ky sukses është i mirëpritur, ai ushtron presion mbi sistemin e burgjeve. Në vitin 2023, viti i fundit për të cilin ka të dhëna të disponueshme, gjykatat suedeze dhanë dënime me burg në total pak më pak se 200,000 muaj, 25% më shumë se një vit më parë dhe dyfishuar në krahasim me 2014.
Burgjet suedeze janë plot dhe agjencia kompetente thotë se deri në vitin 2033 do t’i nevojiten rreth 27,000 shtretër, nga 11,000 që ka sot.
Matthias Wallstedt, kreu i komitetit, tha se nuk kishte asnjë pengesë ligjore që Suedia të merrte me qira hapësira burgu jashtë vendit, por shtoi se një propozim i tillë fillimisht duhet të kalojë nga parlamenti.
Autoritetet po përballen gjithashtu me një valë të paprecedentë sulmesh me bomba, kryesisht në rajonin e Stokholmit. Vetëm në janar, ka pasur 30 sulme me bomba, shumica prej tyre në kuadrin e zhvatjes së bandave ndaj kompanive dhe qytetarëve, tha policia. /tesheshi.com/
