Nga Bashkim Kastrati
Zgjedhjet lokale të 22 tetorit ndoshta janë më interesantet që nga paslufta në Kosovë. Kjo për faktin se në shumë komuna, disa nga bastionet e partive politike pritet të bien dhe të merren nga parti të tjera, ku kërcënuesi kryesor Vetëvendosje; kjo pasi në zgjedhjet e përgjithshme, ato të 11 qershorit, kjo parti doli e para pa koalicion, rezultat që synon ta marrë edhe në lokalet e datës 22.
Por e gjithë dilema është nëse do të votohet njësoj si me 11 qershor? Që do të thotë se a do e diferencon votuesi siglën e partisë nga kandidati? Nëse mbetet vota e njëjtë, në shumë komuna si Gjilani, Podujeva, Fushë Kosova, Dardana (Kamenica), Istogu, Ferizaj dhe të tjera, mund të përmbysen.
Një përgjigje për orientimin e votës nga niveli qendror në atë lokal na e jep hulumtimi i prezantuar nga Instituti GAP. Të dhënat e përdorura në këtë raport burojnë nga hulumtimi në terren që është realizuar në 38 komuna të Kosovës nga data 14 deri më 25 shtator 2017.
Rezultatet e këtij hulumtimi tregojnë se rreth 56% e qytetarëve të anketuar janë shprehur se vota e tyre nuk do të ndryshojë nga ajo e zgjedhjeve parlamentare të 11 qershorit, kurse 14% kanë deklaruar se do të votojnë ndryshe më 22 tetor, ndërkaq 13 % ende nuk kanë vendosur. Rreth 7% e të anketuarve kanë deklaruar se nuk do të votojnë fare në këto zgjedhje.
Sa i përket pyetjes se çka marrin për bazë qytetarët kur vendosin se cilin kandidat do ta votojnë për kryetar/e komune, shumica e të anketuarve janë përgjigjur se bazohen në programin dhe premtimet e kandidatit/es, por edhe në përvojën dhe edukimin e tij/saj.
Kandidatët e rinj në moshë, më të përkrahurit
Siç duket, qytetarët e Kosovës kërkojnë të ndërrojnë edhe brezin e atyre që do t’i udhëheqin. Ata ndoshta kanë humbur besimin tek më të moshuarit, ndërkaq i japin përparësi kandidatëve që janë në moshë më të re, e të cilët perceptohen se kanë një përgatitje më të mirë profesionale dhe kanë mendësi më progresive dhe janë më bashkëpunues sesa kandidatët më të moshuar.
Rezultatet e anketës tregojnë se votuesit favorizojnë më shumë kandidatët e rinj në moshë. Programi, përgatitja shkollore dhe përvoja politike janë po ashtu faktorët kryesorë që ndikojnë në votën e qytetarëve edhe për kuvendin komunal.
“Hulumtimi gjithashtu tregon se mbi 70% e qytetarëve janë të prirë të besojnë se zgjedhjet lokale të 22 tetorit do të sjellin ndryshime pozitive për familjet e tyre dhe komunitetin ku jetojnë. Por, vetëm 7% e të anketuarve janë plotësisht të bindur se do të ndodhin ndryshime pozitive pas zgjedhjeve lokale”, thuhet ndër të tjera në raport.
Ndërkaq, nga analizimi i mëtejmë i përgjigjeve të anketuarve kundrejt moshës së tyre, vërehet se 71% e atyre që do të votojnë për kandidatin për kryetar të komunës që vije nga partia e njëjtë për të cilën ata kanë votuar me 11 qershor janë të moshës 18-44 vjeç ku dominon kategoria e të rinjve 25-34 vjeç.
Në lidhje me qëndrimin e qytetarëve sa i përket votimit të një kandidati i cili nuk i përket etnisë së tyre, rezultatet tregojnë se, në përgjithësi, votuesit nuk preferojnë të votojnë dikë nga etnitë tjera, pa marr parasysh përgatitjen e tij/saj.
“Qytetarët e anketuar, të cilët kanë më shumë kontakte me pjesëtar të komuniteteve tjera, siç janë Prizreni dhe Mitrovica, janë më të prirë të votojnë për kandidatët e etnive tjera. Gjithashtu, të anketuarit nga komuniteti boshnjakë, serbë dhe shqiptarë janë më refuzues ndaj kandidatëve të etnive tjera, se sa të anketuarit nga komunitetet egjiptianë, romë apo goranë”, thuhet në raport.
Rezultatet e anketës tregojnë se rreth 45% e të anketuarve kanë pritshmëri që komuniteti i tyre do të përfitojë nga investimet e komunës gjatë mandatit të ri qeverisës. Por, vetëm 7% janë plotësisht të bindur se ndryshimet positive do të prekin komunitetin e tyre. Rreth 30% e qytetarëve të anketuar nuk kanë pritshmëri të mëdha se do të ketë ndryshime pozitive për komunitetin ku ata jetojnë. Kurse 27% kanë deklaruar se nuk presin që komuniteti i tyre do të jetë përfitojë në ndonjë mënyrë nga komuna në mandatin e ardhshëm.
Në këtë hulumtim janë anketuar 1,065 qytetarë të Kosovës: shqiptarë (818), serbë (150) dhe pjesëtarë të komuniteteve të tjera (97). Ky hulumtim nuk ka pasur për qëllim identifikimin e prirjeve të qytetarëve se për cilin subjekt politik do të votojnë. /tesheshi.com/
