Marrëdhëniet mes Gjermanisë dhe Turqisë nuk janë të mira prej kohësh, dhe fërkimeve të njëpasnjëshme u është shtuar një tjetër së fundi.
Zëvendëskryetarja e parlamentit turk, e njëkohësisht një deputete e AKP-së, partisë që qeveris vendin, është ndaluar për orë të tëra në aeroportin e Këlnit për probleme me pasaportën. Ayşenur Bahçekapılı ka humbur dokumentet e saj të identifikimit gjatë një vizite në Gjermani, dhe është paraqitur në aeroport me një pasaportë të përkohshme, të lëshuar nga konsullata turke. Autoritetet gjermane e kanë mbajtur atë për orë të tëra, edhe pse ajo u ka shpjeguar se është deputete e zëvendëskryetare e parlamentit turk.
“Kjo është BE-ja juaj? Nuk e duam një BE të tillë,” ka treguar ajo t’u ketë thënë e nervozuar autoriteteve policore gjermane në aeroport.
Ankaraja ka reaguar për incidentin duke thirrur ambasadorin gjerman në Turqi, Martin Erdmann, të cilit i është përcjellë pakënaqësia për ngjarjen.
Presidenti turk, Recep Tayyip Erdoğan, ka reaguar po ashtu dje ashpër. Në një takim me drejtuesit vendorë, ai ka thënë në lidhje me incidentin e me autoritetet gjermane: “Ju i lejoni terroristët dhe i mirëprisni, por e bëni të presë për orë të tëra zëvendëskryetaren e parlamentit dhe delegacionin tonë. A nuk duhet të hakmerremi tani? Turqia do të përgjigjet me të njëjtën monedhë nëse nuk merren masat e nevojshme ndaj zyrtarëve të përfshirë.” /tesheshi.com/
