Një vajzë muslimane e mbuluar është sulmuar brutalisht dhe është qëlluar me grusht në fytyrë në qendër të qytetit të Birmingamit në Angli.
Zonusha Choudhury, 18 vjeçe, e cila pranoi të identifikohej vetëm më mbiemrin e saj, tha se ka mbetur e tronditur nga sulmi i cili ndodhi teksa ecte përgjatë New Street.
Sulmuesi i erdhi nga pas dhe më pas e goditi. “Po ecja te stacioni i trenit me disa shoqe kur dikush me shtyu nga pas. Kur e ktheva kokën, me goditi në fytyrë e pastaj iku.”
Vajza e re tha për mediat se është shokuar aq shumë sa tani ka frikë të dalë e vetme në rrugë. “U trondita dhe u frikësova shumë. Si mundet dikush të sulmojë dikë pa asnjë arsye. Nuk ndihem aspak e sigurtë,” tha ajo.
Studentja ka marrë disa mavijosje, por impakti më i madh ka qenë ai emocional. Ajo shprehu frikën se muslimanët po shënjestrohen gjithnjë e më shumë për shkak të sulmeve terroriste në Paris muajin e kaluar.
“Jeta është bërë e vështirë për muslmanët. Ne nuk duam të vriten njerëzit e pafajshëm. Nuk është kjo feja jonë. Feja jonë thërret për paqe,” tha ajo.
Madje, për shkak të frikës së madhe prindërit i kanë kërkuar që ta heqë shaminë.
Ndërkohë policia e West Midlands tha se po e hetojnë sulmin, duke u shprehur se i marrin shumë seriozisht rastet e sulmeve të nxitura nga urrejtja.
Raste të ngjashme kanë ndodhur edhe pas sulmeve të Charlie Hebdo-s, ku një nënë e re u sulmua nga tre gra tek sa shkonte për të marrë dy fëmijët e saj të vegjël në shkollë. Asaj iu hoq shamia në mes të rrugës e më pas u dhunua fizikisht nga tre gra. Ndërsa një tjetër grua shtatzanë u sulmua në Francë vetëm pak ditë nga Charlie Hebdo. Ajo u godit me shqelma në bark nga disa të rinjë në rrugë. Si pasojë e kësaj ajo humbi fëmijën e saj.
Sulmet islamofobë kanë pasur në shënjestër kryesisht femrat, të cilat shihen si më të dobëta e më të lehta për t’u sulmuar. /tesheshi.com/
