Aktorja amerikane dhe e dërguara e posaçme e Agjencisë për Refugjatët e Kombeve të Bashkuara, Angelina Jolie, ka deklaruar se ndihet shumë e dekurajuar nga reagimi i SHBA-ve ndaj krizës globale të emigrantëve, duke shprehur frikën se shtete të ndryshme do të adaptojnë masa përherë e më izoluese në vend që të veprojnë bashkarisht për të gjetur një zgjidhje.
Jolie deklaroi ditën e sotme se, ‘’brengoset për faktin se emigrimi i pakontrolluar u ka dhënë legjitimitet atyre njerëzve të cilët promovojnë politikën e frikës dhe përçarjes”.
Ajo ka thënë se vendet duhet të bëhen bashkë për ta administruar situatën e 60 milionë të zhvendosurve, duke ngritur një sistem të koordinuar mirë dhe të rregullt për trajtimin e refugjatëve dhe emigrantëve.
“Jam shumë e dekurajuar nga vendi im për reagimin ndaj situatës,’’ ka treguar Jolie, duke iu referuar pretendentit të republikanëve për kandidaturën presidenciale, Donald Trump-it, i cili pati propozuar më herët ndalimin e përkohshëm të hyrjes në SHBA të të gjithë myslimanëve.
“Amerika është ndërtuar nga njerëz të ardhur nga e gjithë bota për shkak të lirisë, sidomos lirisë së ushtrimit të fesë, andaj është e rëndë të dëgjosh fjalë të tilla nga dikush që pretendon të jetë president i SHBA-ve,” ka thënë Jolie. /tesheshi.com/
