Angela Merkel: Nuk do ta lëmë Ballkanin në dorë të rusëve!

Angela Merkel, pas një takimi me kryeministrin e Bullgarisë, Bojko Borisov, i cili ka arritur të fitojë zgjedhjet përballë kandidates filoruse, ka shpallur përfundimisht se BE ka hapur krahët dhe tani nuk do ta lërë vetëm Ballkanin Perëndimor në dorën e atyre që “duan të kenë influencën e tyre”, duke nënkuptuar Rusinë.

“Do të theksojmë edhe një herë mbështetjen tonë për këto vende gjatë procesit të integrimit të tyre në BE pasi shihet qartë se ka interesim edhe nga vende tjera që duan të rrisin influencën e tyre ne Ballkan”, tha Merkel.

Kryeministri bullgar vuri në dukje rëndësinë e madhe që ka integrimi i këtyre vendeve në BE dhe se pozicioni gjeografik i Bullgarisë jep mundësi për të bërë shumë që Ballkani të ecë përpara .

“Dëshiroj shumë, që të ketë një perspektivë të thjeshtë edhe për njeriun e thjeshtë në rrugë, nuk bëhet fjalë për elitat, por për qytetarin normal të Ballkanit, që qytetari i thjeshtë ta dijë, se ai do të jetë një ditë anëtar i BE, që do të jetë një njeri i lirë e  që do të mund t’i gëzojë të gjitha të drejtat që sjell anëtarësimi në Bashkimin Europian”, tha Borissov.

Bullgaria që prej 10 vitesh është pjesë e Bashkimit Europian, nga 1 janari i vitit të ardhshëm për herë të parë do të marrë drejtimin e presidencës së Bashkimit Europian. Kancelarja Merkel vlerësoi edhe bashkëpunimin e lartë bilateral të të dy vendeve, posaçërisht atë në fushën ekonomike.

Kancelarja gjermane bëri të qartë rëndësinë e bashkëpunimit sa më të mirë midis vendeve të Europës, sidomos pas largimit të Britanisë së Madhe nga BE dhe situatës së komplikuar gjeopolitike./tesheshi.com/