Skocezi Andy Murray është vetëm një fitore larg nga ngjitja në vendin e parë në klasifikimin botëror të tenisit për meshkuj. Çka do të thotë se ai do t’i japë fund mbretërimit 122 javësh të serbit Novak Djokovic si numri një në botë.
Në “Paris Masters,” Murray fitoi 2-0 në çerekfinale ndaj çekut Tomas Berdych, dhe do të luajë sot në gjysmëfinale, rreth orës 15:30, ndaj kanadezit Milos Raonic. Fitorja në këtë takim nënkupton marrjen e vendit të parë në klasifikimin botëror.
Ndryshe tij, Djokovic u mund në mënyrë të papritur në çerekfinale nga Marin Cilic. E çuditshmja është se Cilic i kishte humbur të 14 përballjet e mëhershme me serbin, por fitoi 2-0 këtë herë.
Djokovic duhet të arrinte në finale të turneut për të mbajtur vendin e parë në botë, që tani e sheh se mund të shkojë për një tjetër tenist.
“Ai është përfundimisht një lojtar që e meriton atë,” do të deklaronte Djokovic për mundësinë që Murray të bëhet tenisti numër një.
“Shumë respekt për atë çfarë ai ka bërë,” ka shtuar serbi. /tesheshi.com/
