Artikulli i fundit i Doruntina Baftiu për REL mbi pikëpamjet e të rinjve kosovarë për Andrew Tate paraqet një pamje të pabalancuar dhe të padrejtë të influencuesit britaniko-amerikan.
Edhe pse autorja e shkrimit pranon se shumica e klasës në një shkollë në Kosovë e sheh pozitivisht ndikimin e Andrew Tate, artikulli fokusohet pothuajse ekskluzivisht në mendimet negative të një studenteje, duke injoruar këndvështrimet e studentëve meshkuj që mbrojnë Tate-n.
Artikulli gjithashtu paraqet një portretizim të njëanshëm të deklaratave të diskutueshme të Tate-s, duke injoruar nuancën e argumenteve të tij e duke mos marrë në konsideratë fare argumentimet e Tate-s mbi temat kontroverse për të cilat akuzohet. Ndonëse është e vërtetë që Tate ka bërë komente mbi gratë që disa mund t’i konsiderojnë fyese, ai gjithashtu ka shprehur mbështetje për të drejtat e grave dhe ka kritikuar mizogjininë ekstreme.
Në një intervistë të gjatë ai është shprehur se “është i gatshëm të vdesë për të mbrojtur gratë”.
Për më tepër, ndalimi i tij nga platformat e mediave sociale si TikTok, Instagram dhe Facebook për opinionet e tij të diskutueshme, sugjerojnë se ai është viktimë e censurës dhe jo një mizogjen i rrezikshëm.
Përmendja në artikull e arrestimin të vëllezërve Tate në Rumani për akuza për trafikim dhe përdhunim është gjithashtu shumë e diskutueshme. Akuzat ndaj Tate-s dhe vëllait të tij janë thjesht akuza dhe nuk janë provuar në gjykatë. Sipas avokatës së tyre amerikane, gjykata rumune nuk ka ngritur akoma asnjë akuzë konkrete ndaj vëllezëve. Autorja e shkrimit duket se vetëm ka ricikluar pretendime të mediave të huaja mbi rastin e Tate-s, por pa i verifikuar vetë ato. Është gazetari e papërgjegjshme të përsëritësh pretendime të paverifikuara pa paraqitur një pamje të balancuar të situatës.
Në fund, autorja nuk arrin t’i japë një përgjigje të qartë pyetjes kryesore të shkrimit të vet: Si ka ndikuar fenomeni “Andrew Tate” te nxënësit në Kosovë? Ajo vetëm paraqet disa pohime mbi shtimin e dhunës te të rinjtë, por pa shpjeguar se çfarë lidhje ka kjo me ndikimin e supozuar negativ të Andrew Tate-s te rinia kosovare.
Mund të thuhet se Andew Tate është më shumë viktimë e keqinterpretimit dhe censurës. Pavarësisht se disa pikëpamje të tij mund të jenë të diskutueshme, ai ka të drejtë t’i shprehë ato pa frikën e persekutimit ose censurës. Media duhet të jetë më e ekuilibruar në mbulimin e rasteve të tilla dhe të shmangë stereotipet apo keqinterpretimet e pikëpamjeve të përsonave në shqyrtim. /tesheshi.com/
