Tensionet me Turqinë do të jenë të larta në axhendën e samitit të Bashkimit Europian këtë fundjavë, ndërkohë që ka thirrje brenda bllokut për ngrirje të marrëdhënieve, nis një analizë e Al Jazeera-s, e cila u kushtohet raporteve të tensionuara të Brukselit, por dhe qendrave të tjera europiane, me Ankaranë.
Zyrtarët turq dhe evropianë kanë qenë në një luftë fjalësh, me Ankaranë e cila ka akuzuar anëtarët e BE se kanë mbështetur terrorizmin dhe politikanët e BE-së në anën tjetër që pretendojnë për një përkeqësim të të drejtave demokratike dhe të njeriut në Turqi.
Kancelarja gjermane, Angela Merkel ka thënë se krerët e BE-së nuk do të marrin një vendim nëse do të ngrijnë kërkesën e Ankarasë për anëtarësim në BE gjatë samitit të ardhshëm në Bruksel, i cili fillon më 18 tetor.
“Sigurisht që nuk do të marrim ndonjë vendim, por dua të dëgjoj pikëpamjet e kolegëve të mi për marrëdhëniet dypalëshe me Turqinë”, tha ajo të shtunën.
Në shtator, në një debat televiziv përpara zgjedhjeve parlamentare të Gjermanisë, Merkel tha se “Turqia nuk duhet të bëhet anëtare e BE”.
Qëllimi i fundit i Merkel është të bindë shtetet e tjera anëtare që të miratojnë pezullimin e bisedimeve të anëtarësimit me Turqinë, tha Can Baydarol, nënkryetari i European Union and Global Research Association me seli në Ankara.
“Megjithatë, pas presidencës së Emmanuel Macron në Francë, Berlini dhe Parisi kanë qenë në një luftë pushteti brenda BE-së. Nuk është e mundur të arrihet ky konsensus për shkak të qëndrimit të Francës kundër një veprim të tillë kundër Turqisë”, tha Baydarol.
“Franca dhe disa vende të tjera besojnë se Turqia ka një rol vendimtar në Lindjen e Mesme, për shkak të krizave të shumëfishta që po vazhdojnë, dhe kjo është arsyeja përse Merkel kohët e fundit ka thënë se nuk do të marrin vendime për pezullimin e bisedimeve në këtë samit”, shtoi ai.
Turqia dhe BE kanë bashkëpunuar për çështje të tilla si kriza e refugjatëve, siguria dhe lufta e Sirisë, një situatë që duket se i ka bërë disa shtete anëtare hezituese të prishin lidhjet.
Si pjesë e një marrëveshjeje për vitin 2015, Ankaraja mori fonde nga BE në këmbim të kthimit të refugjatëve në Turqi, por çështja mbetet te efikasiteti i zbatimit të marrëveshjes në një kohë të tensioneve në rritje.
Shtetet anëtare të BE-së dhe Turqia gjithashtu ndajnë informacione të intelegjencës dhe janë aleatë në koalicionin që lufton Shtetin Islamik të Irakut dhe grupin Levant (ISIL, gjithashtu i njohur si ISIS).
Por presidenti turk, Rexhep Tajip Erdogan ka refuzuar ashpër bllokun në muajt e fundit, duke deklaruar publikisht se vendi i tij “nuk ka nevojë për BE” më, me qeverinë e cila ka akuzuar disa shtete anëtare të BE-së se kanë mbështetur në mënyrë aktive terrorizmin.
Baydarol thotë se raporti vjetor i progresit të Komisionit Evropian për bisedimet e anëtarësimit me Turqinë, që do të lëshohet në nëntor, do të jetë një hap i rëndësishëm i samitit të kësaj fundjavë, pasi raporti pritet të kritikojë ashpër Turqinë.
“Duke marrë parasysh këto kritika në raport dhe rekomandimin e Komisionit, krerët e BE-së mund të marrin një vendim konkret për kandidaturën e Turqisë në BE në samitet e ardhshme”, tha ai.
Përgatiti: Jeton Zenuni – /tesheshi.com/
