Politika e zgjerimit të BE është e lidhur ngushtë me dialogun Kosovë-Serbi dhe nëse forcohet. kjo mund të çojë në dështimin për të negociuar dhe kthimin e një “ideje të rrezikshme” për shkëmbimin e territoreve, tha analisti gjerman Bodo Weber.
“Pa zgjerim, negociatat e Kosovës dhe të Serbisë mund të përfundonin pa sukses dhe status quo do të vazhdonte, gjë që do të nënkuptonte destabilizimin ose, më keq, një marrëveshje të rrezikshme shkëmbimi, e cila mund të shtyjë Kosovën, Serbinë dhe Ballkanin Perëndimor drejt dinamikës shkatërruese të spastrimit etnik”, paralajmëroi ai.
Ai gjithashtu shpreson se “takimi i fundit i Këshillit të BE-së nuk ishte shkatërrimi përfundimtar i politikës së zgjerimit” (mos’hapja e negociatave me Tiranën dhe Shkupin).
Sipas mendimit të tij, “gjithçka tregon se nuk do të ketë vazhdim të dialogut para marsit 2020, gjë që kundërshton të dërguarin special të Shtëpisë së Bardhë për Kosovën Richard Grenell, i cili kërkoi që të arrihet një marrëveshje deri në shkurt.
“Kam frikë se Grenell e ka diskredituar veten në rolin e tij të ri në kohë rekord me deklarata të tilla”, tha Weber.
Ai gjithashtu tha se të gjithë aktorët në rajon, si dhe krijuesit e politikave perëndimore, e dinë se “do të jetë shumë e vështirë të vazhdohen negociatat në Bruksel dhe të arrihet një marrëveshje para marsit 2020, kur të mbahen zgjedhjet në Serbi”.
Sidoqoftë, Weber beson se Kosova dhe Serbia nuk duhet të presin me marrëveshje derisa BE të zgjidhë problemet e saj të brendshme dhe reformat.
“Fundi i procesit të negociatave varet nga BE-ja, jo nga Prishtina dhe Beogradi”, tha Weber.
Ai përfundon se shkëmbimi i territoreve nuk do të ndodhë, pasi “shumica e vendeve të BE-së e kundërshtojnë atë”. /tesheshi.com/
