Nga Blendi Gashi
Opozita kosovare pezulloi për kohë të caktuar protestat dhe ky vendim bëri që të enjten Prishtina të jetë më e qetë, pa protesta, ama po me atë fjalorin e ashpër mes pozitës dhe opozitës.
Ka qenë ish -ryeministri Hashim Thaçi i cili me të kuptuar se nuk do të ketë protesta deri më 28 nëntor, ka thumbuar opozitarët duke thënë se janë tërhequr nga dhuna me arsye për të blerë kohë.
“Ata mund të tërhiqen sot, por qytetarët dhe institucionet shtetërore nuk do të tërhiqen kurrë sepse me asnjë çmim nuk do të lejojmë shkatërrimin e shtetit nga një grup opozitar i dhunshëm”, është shprehur Thaçi.
Por ndërkohë, lideri i AAK-së, Ramush Haradinaj u ka dërguar mesazhe kryeministrit Mustafa dhe zëvendësit të tij, Thaçi se edhe ata mund të kenë pasoja për veprimet e tyre.
“Edhe Mustafa, edhe Thaçi duhet ta mendojnë se një ditë munden të thyhen edhe dyert e shtëpive të tyre, sepse ata nuk janë jashtëtokësorë”, ka deklaruar Haradinaj.
Megjithatë, përkundër fjalorit të ashpër mes të dy palëve, analistët në vend e vlerësojnë veprimin e opozitës për të pezulluar për disa ditë protestat, duke thënë se tani e ka radhën pozita që të relfektojë, në mënyrë që të gjindet një zgjidhje dhe të dilet nga kriza e madhe politike që ka kapluar vendin.
Analisti Florim Zeqa, deklaron se veprimi i opozitës kosovare për pezullimin e protestave është një hap para dhe shumë i rendësishëm drejt normalizimit të situatës kaotike në vend. Ai, në një prononcim për tesheshi.com, thotë se situata konfliktuoze nuk i shkon përshtat askujt në Kosovë, në këtë rast as opozitës, andaj sipas tij zgjidhja është në dorën e qeverisë, ashtu sikurse edhe përgjegjësia në rast të mosreflektimit pozitiv.
“Pas këtij hapi të madhë të opozitës, duhet të reflektojë pozitivisht edhe pozita, me ndërmarrjen e veprimeve të duhura konform situatës politike në vend, siç janë: vendimi për ndërprerjen e menjëhershme e dialogut politik me Serbinë, derisa Gjykata Kushtetuese të japë verdiktin final mbi marrëveshjet e 25 gushtit në Bruksel, vënia e reciprocitetit në pikat doganore dhe në zbatueshmërinë e marrëveshjeve të Brukselit, vendimi për rishikimin e Demarkacionit me Malin e Zi, heqja e të gjitha akuzave ndaj opozitës dhe lirimi i menjëhershëm i protestuesve (në këtë rast lirimi i Donika Kadaj Bujupit). Besoj se ndërmarrja e hapave të mësipërm nga qeveria, do të krijonte bazë të mjaftueshme kredibile që edhe në të ardhmen opozita të reflektojë më pozitivisht në veprimet e saja”, thotë Zeqa.
Besa Luzha, koordinatore e programit në fondacionin gjerman ‘Friedrich Ebert Stiftung’, përmes një shkrimi në Facebook e ka quajtur refektim me vend vendimin e opozitës që këto ditë të mos vazhdohet me protesta.
“Reflektim me vend! Ofrimi i mundësisë për tejkalim të krizës, është veti e liderëve të suksesshëm. Nuk është dobësi të reflektosh dhe t’i japësh shans paqes, dialogut. Ata që barrikadohen kundër kësaj janë frikacakë”, shprehet Luzha.
Njohësi i rrethanave politike në vend, Blerim Burjani, ka deklaruar për tesheshi.com se pezullimi i protestave është i përkohshëm dhe se nuk nënkupton se ka heqje dorë nga protestimi apo forma bllokimeve të institucioneve.
“Kishte paralajmërime që do të bëhen edhe forma të tjera të rezistencës nga opozita e cila është unike në mbajtjen e protestave, por jo për ndonjë propozim për të arritur zgjidhje. Deri më tash nuk kemi parë ndonjë alternativë që atyre do t’iu konventonte apo që do të zbrapseshin nga veprimet e dhunës e cila është e papranueshme në cilindo rrafsh vendor apo ndërkombëtar”, thekson Burjani.
Faik Krasniqi, ka deklaruar për tesheshi.com se në asnjë mënyrë nuk i arsyeton kur protestat bëhen të dhunshme dhe dëmtojnë pronën shtetërore ose private, por asnjë pushtet, lider, parti apo politikan, nuk mund as ta poshtërojë e as ta zhvlerësojë një peticion të nënshkruar nga më shumë se 200 mijë qytetarë.
“Ky pushtet duhet të hapë krahun dhe të dorëhiqet, në mënyrë që populli kësaj rradhe me votën e tij ta zgjedh një qeveri dhe një Kuvend të përgjegjshëm, që punon për interesa të shtetit dhe të popullit. Por, para se të ikin nga pushteti, këta pushtetarë dhe në përgjithësi kjo klasë politike, së pari duhet t’i kërkojnë falje popullit për vuajtjet që ua kanë shkaktuar dhe menjëherë t’u dorëzohen organeve të drejtësisë, që ta marrin dënimin e merituar. Përndryshe, populli me ose pa votë, duhet t’ua jap dënimin që e meritojnë, pa përjashtim, të gjithë kriminelëve, banditëve, hajnave, fundërrinave dhe horrave të politikës”, thekson Krasniqi.
Opozita ka njoftuar se më 28 nëntor do të mbajë, siç e ka quajtur, manifestim për të kundërshtuar ‘Zajednicën’ dhe Demarkacionin me Malin e Zi.
Megjithatë, nuk përjashtohet mundësia që protesta të ndodhin edhe para kësaj date, sidmos në rast të arrestimit të deputetëve të VV-së, Albin Kurti, Albulena Haxhiu dhe Faton Topalli ndaj të cilëve është lëshuar fletë arrest nga gjykata. /tesheshi.com/
