Nga Blendi Gashi
Të gjitha partitë politike në Kosovë që nga paslufta janë udhëhequr ose vazhdojnë të udhëheqen nga persona të njëjtë të cilët pa dallim, kanë sunduar partinë dhe sigurisht kanë punuar në eliminimin politik të kundërshtarëve dhe konkurrentëve të tyre brenda partiak.
Reformim dhe demokratizim, do të thotë inkuadrim cilësor i vlerave të reja, e jo siç kanë bërë partite kosovare që në krye kanë mbajtur figura të konsumuara dhe për më tepër njerëz që dyshohet se janë të lidhur fort me afera krimi e korrupsioni.
Duke filluar nga dy partitë më të mëdha PDK dhe LDK nëse shihet struktura udhëheqëse e tyre që nga paslufta vërehet fare lehtë se çdo herë kanë vendosur dhe vazhdojnë ta kenë fjalën kryesore “të mëdhenjtë” e partisë, pra kryetari dhe nënkryetarët.
Njëjtë ka ndodhur edhe në partitë tjera, në AAK, Vetëvendosje, NISMA për Kosovën dhe Aleancën Kosova e Re.
Partitë në fjalë edhe pse çdo ditë preznatojnë figura të reja, një gjë e tillë e bëjnë më shumë për tu mburrur se kinse po rriten, por jo pse shumica prej anëtarëve të rinj me të vërtetë kanë vlera të mirëfillta dhe do të ngritën në struktura të larta të partisë për të punuar për ndryshim si brenda partisë dhe më pas për të mirën e shtetit.
Analistët politik në Kosovë konsisderojnë se duhet urgjetisht të ndodh reformimi brenda partive sepse së pari u konvenon atyre që të sjellin gjak të ri, të largojnë figurat e harxhuara dhe të përfshira në afera të ndryshme, që të nis një epokë e ndryshimit në vend.
Arsim Haziri, njohës i rrethanave politike në vend thotë se situata e sotshme ndërlidhet pikërisht nga mungesa e një klase më e besueshme dhe të përgjegjëshme dhe si rezultat i këtij niveli gjendet edhe rendi politik dhe ekonoik në vend
“Them me përgjegjësi se skena politike do të mund të ishte më e vetëdijshme dhe llogaridhënëse për çdo vendim e politikë vetëm nëse përbrenda skenës do të kishim garniture të re politike dhe zhvillimi i mundshëm ose i pritshëm mund të vie vetëm përmes mendësisë së re politike dhe kjo mund të refletohet praktikisht me një reformim të përgjithshëm në subjekte politike.
Kosovës urgjentisht i nevoitet parimi i reformimit në idejen për të pasur ligj më të zbatueshëm dhe ekonomi më të fuqishme, kjo njëherit përfaqëson bazë për çdo pretendim shtetëror”, thotë analisti Haziri, për tesheshi.com.
Leon Duhanaj, analist politik në vend poashtu e sheh të nevojshme reformimin e subjekteve politike.
Duhanaj thotë se politika si e tillë, quhet shkencë, por ka shumë që dyshojnë t’i japin këtë epitet, pasi që si e tillë nuk mund të lokalizohet ekzaktësisht në atë që përfaqëson.
Ai thotë se politika njihet si arti i së mundshmes dhe, si e tillë mendon që është shkencë mbi shkencat, pasi që menaxhon me të gjitha shkencat, duke përfshirë të gjitha resurset ekzistuese.
“Jeta politike është jetë dinamike, e gjallë e cila zhvillohet dhe avancohet çdo dit dhe i përshtatet çdo rrethane të krijuar. Partitë politike janë mekanizma te të zhvilluerit të mendimit politik. Këta mekanizma dallojnë mes vete në ide dhe për këtë kemi edhe subjekt të ndryshme, por që qëllim kryesor duhet ta kenë gërshetimin e këtyre ideve për të mirën e përbashkët, për të mirën e përgjithshme.
Në Kosovë, në masë të madhe është keqkuptuar arti i politikës, duke u shndërruar në një zeje për pasurim të shpejt, për interesa të ngushta nepotiste e klanore. Në këtë kontekst, nuk zgjedhën as mjete e as metoda, qëllimi kryesor është mbajtja gjallë idesë së pushtetit dhe të mirave materiale që sjell me vete”, thotë Duhanaj, për tesheshi.com.
Ai shton se ka nevojë për reforma thelbësore në politikë, ka nevojë për reforma thelbësore në subjektet politike, sepse aty sipas tij duhet të filloj dhe burojë ideja e së mirës së përbashkët.
“Këtë nuk mund ta bëjnë figurat të cilat e kanë shkaktuar këtë kaos. Ndryshimet duhet të vinë nga njerëz të ri, me ide dhe vizion të ri.
Politika në radhë të parë duhet të kuptohet si profesion me përgjegjësi të lartë publike. Për ta kuptuar drejtë kërkohen forca dhe njerëz të ri të cilët kanë dijen vullnetin dhe guximin për t’u përballur me sfidat e kohës”, deklaroi analisti Duhanaj.
/tesheshi.com/
