Pas problemeve të shfaqura në Greqi me trajtimin e refugjatëve, që kanë çuar dhe në përplasje masive, është Austria që përmendet për sjelljen e keqe me ta.
Amnesty International nuk është treguar aspak e kursyer kur ka ardhur puna për ta përshkruar trajtimin që po marrin azilkërkuesit në një qendër pranë Vjenës, duke e quajtur atë skandaloz!
Rreth 2000 refugjatë në një qendër në Traiskirchen, në jug të Vjenës, kryeqytetit austriak, po qëndrojnë prej javësh në qiell të hapur, duke përballuar të nxehtin e pazakontë të kësaj vere, si dhe stuhitë e herëpashershme.
Pas publikimit të një raporti mbi Traiskirchen-in, kreu i degës austriake të organizmit të mësipërm, Amnesty Austria, Heinz Patzelt, do të thoshte, “Ajo çka ne gjetëm është plotësisht skandaloze, ngaqë të drejtat njerëzore po shkelen aty masivisht pas asnjë arsye që ka të bëjë me burimet.”
Ministria austriake e Punëve të Brendshme iu përgjigj kritikave të ashpra duke e përligjur gjendjen me rritjen e numrit të refugjatëve dhe krijimin, si rrjedhojë, të një situate të jashtëzakonshme, por theksoi se po punonte për përmirësimin e situatës.
Numri i kërkesave për azil në Austri ka arritur në 28.300 në gjashtë muajt e parë të këtij viti, duke e kaluar shifrën e tërë vitit të shkuar.
Austria ka kërkuar më herët një shpërndarje të emigrantëve në Bashkimin Europian, dhe po i dërgon tani 500 azilkërkues në Sllovaki, për t’i dhënë zgjidhje problemit të krijuar në Traiskirchen. Në diskutim e sipër është dhe një ligj i ri për trajtimin e refugjatëve. /tesheshi.com/
