Një vajzë muslimane ka treguar se tre burra, teksa thërrisnin emrin e Donald Trump-it, janë munduar t’ia heqin shaminë nga koka, ndërkohë që askush nuk e ka marrë mundimin t’i dalë në mbrojtje.
Studentja 18-vjeçare Yasmin Seweid ishte rrugës për në shtëpi nga universiteti i saj në Nju Jork kur tre burra të bardhë filluan ta ngacmonin, duke e quajtur terroriste.
Sipas raportimeve, ata i grisën çantën dhe e quajtën “leckë” shaminë e saj. Pavarësisht kërkesave të saj për ta lënë të qetë, ata vazhduan t’i shkonin nga pas në tren.
Ajo tregon në një postim në profilin e saj në Facebook se fjalët e tyre ishin mjaft të rënda: “Shikoje ku***n terroriste,” “Kthehu në vendin tënd,” etj.
Studentja tregoi për Dallas News se po dridhej e tëra dhe se ishte jashtëzakonisht e traumatizuar dhe e frikësuar.
Por më e trishtueshmja, deklaroi ajo, ishte fakti se akush nuk i doli në mbrojtje. Të gjithë vetëm rrinin e shikonin teksa tre burrat po e sulmonin fizikisht.
“Të thyhet zemra kur shikon që askush nuk e merr mundimin të të dalë në mbrotje, por, përkundrazi, rrinë e bëjnë sehir. Amerika e Trump-it është kthyer në realitet,” tha ajo. “E këtë sapo e provova në lëkurën time.” /tesheshi.com/
