Avionët luftarakë të SHBA-ve kanë kryer për herë të parë sulme ajrore mbi qytetin libian të Sirtes, duke goditur pozicionet e ISIS-it.
Lajmi është pohuar si nga qeveria libiane e unitetit, ashtu dhe nga Pentagoni.
“Sot janë kryer sulmet e para ajrore amerikane mbi pozicione të sakta të organizatës së DAESH-it (ISIS-it), duke shkaktuar humbje të mëdha në Sirte,” ka njoftuar kryeministri libian Fejiz el-Sarraxh në një fjalim televiziv.
Sekretari i shtypit i Pentagonit, Peter Cook, deklaroi se sulmet ishin bërë me kërkesë të qeverisë libiane të unitetit.
“Me kërkesë të Qeverisë Libiane të Marrëveshjes Kombëtare, forcat ushtarake të Shteteve të Bashkuara kryen sulme të sakta ajrore kundër objektivave të ISIS-it në Sirte, për të mbështetur forcat e lidhura me Qeverinë e Marrëveshjes Kombëtare që kërkojnë ta mposhtin ISIS-in në fortesën e tij kryesore në Libi.”
Operacioni për rimarrjen e Sirtes nga qeveria e unitetit ka nisur në maj, ndërsa qyteti është në duart e ISIS-it që nga qershori i vitit të shkuar.
Deri tani kanë humbur jetën 280 forca proqeveritare, e janë plagosur më shumë se 1.500 të tjerë.
Humbja e Sirtes, që gjendet 450 kilometra në lindje të Tripolit, do të qe një humbje e madhe për ISIS-in, që e ka atë një bastion të tij. /tesheshi.com/
