“Do ta them shumë qartë: pozicioni ynë nuk ka ndryshuar, nuk ka njohje të Kosovës,” ka thënë ambasadorja izraelite në Beograd, Alona Fisher Kam, për të përditshmen serbe Blic.
Ndërsa është pyetur nga e përditshmja serbe nëse mund të përparojnë edhe më shumë marrëdhëniet midis Izraelit dhe Serbisë, ajo është përgjigjur se, “marrëdhëniet e shkëlqyera” mes dy vendeve duhet të konkretizohen në hapa praktikë, që do të sjellin të mira për të dyja vendet.
“Në radhë të parë është ekonomia, dhe unë mendoj se ekziston një potencial i madh. Jemi duke bërë përpjekje që të përcaktojmë se cilat janë zonat më të mira për hulumtime dhe bashkëpunim, për novacione, për shkëmbim të njohurive,” është shprehur Fisher Kam.
E lidhur me pyetjen nëse Serbia, ashtu si Izraeli, mund të mbajë raporte të mira si me Moskën dhe me Uashingtonin, apo duhet të zgjedhë njërën palë, ambasadorja do të thoshte se nuk mendon që shtetet duhet të zgjedhin o njërën o tjetrën palë, duke marrë si shembull të mirë pikërisht Izraelin.
Përfaqësuesja e Izraelit nuk ka pranuar të komentojë nëse ajo e sheh Serbinë në BE, por ka thënë se si diplomate i dëshiron sukses në çdo rrugë që të zgjedhë. /tesheshi.com/
