U bë gati një muaj që kur Kuvendi i Maqedonisë u kthye në funksion, mirëpo sipas ambasadorit të Bashkimit Evropian, Aivo Orav fatkeqësisht ende nuk është vërejtur ndonjë progres për dalje nga kriza e thellë politike.
“BE është seriozisht e shqetësuar rreth situatës. Ne jemi të bashkuar në nevojën për të pasur angazhim të lidershipit politik të vendit në një dialog të hapur. Partitë politike duhet të pajtohen në rrugën përpara për të implementuar marrëveshjen e Përzhinos së vitit 2015, duke përfshirë krijimin e kushteve për zgjedhje të besueshme. Gjatë muajve të fundit sundimi i ligjit ka pësuar sfida të mëtejshme, duke përfshirë edhe faljet nga ana e presidentit të vendit. Sundimi i ligjit është e një rëndësie thelbësore për një shoqëri të fortë demokratike. Prandaj, është po ashtu kyçe që prioritetet urgjente për reforma të propozuara nga Komisioni Evropian të implementohen”, tha Orav.
Përveç tjerash ambasadori përsëriti shqetësimin e BE-së rreth punës së prokurorisë speciale. Sipas tij aktiviteti i prokurorisë speciale nuk duhet të pengohet, por të mbështet nga pushteti.
“Ne vazhdojmë të shqetësohemi rreth sfidave të punës së Prokurorisë Speciale. Ne u bëjmë thirrje të gjitha institucioneve, veçanërisht të gjitha partive që janë pajtuar për themelimin e prokurorisë speciale, të mos e pengojnë dhe në vend të saj t’i japin zyrës mbështetjen e tyre të plotë. Përveç kësaj të gjitha çështjet me të cilat përballet kjo zyrë, po ashtu duhet të trajtohen si një çështje me prioritet”, theksoi Orav./tesheshi.com/
