SHBA drejton gishtin tek gjyqtarët e prokurorët që i konsideron të korruptuar.
Përpara se të nisë testi, pas reformës, për armatën e punonjësve të sistemit të drejtësisë, ambasada amerikane merr masa drastike: u ndalon vizat disa gjyqtarëve dhe prokurorëve në Shqipëri, të cilët konsiderohen të korruptuar, ndërkohë që një grupi tjetër i janë ndërprerë vizat që i janë dhënë.
Këtë e ka konfirmuar vetë ambasadori Donald Lu në një video të shpërndarë nga faqja e Facebook-ut e selisë diplomatike të Uashingtonit.
“Ky është vetëm fillimi kemi shumë më tepër punë për të bërë për të luftuar korrupsionin”, thekson Lu në një përgjigje ndaj një pyetje të ardhur nga një i ri shqiptar.
Pyetje: “Përshëndetje Z.Ambasador. Faleminderit që na dhatë mundësinë që të kemi shansin të komunikojmë me ju dhe kisha një pyetje në lidhje me politikën sot shqiptare. Kur ju dhe Amerika e di shumë mirë që politikanët tanë janë të korruptuar, pse nuk ndërhyni drejtpërdrejt te ta?”
Donald Lu: Pyetje shumë e mirë. Absolutisht korrupsioni është prioritet kryesor i qeverisë së SHBA në Shqipëri. Ne jemi duke marrë masat tona por edhe me shoqërinë civile e udhëheqësit shqiptarë.Vitin e kaluar ne pamë se si partitë politike hoqën disa kandidatë kryesorë kriminelë nga zgjedhjet, politikanë të tjerë të korruptuar apo me të shkuar kriminale janë arrestuar apo kanë dhënë dorëheqjen. Gjithashtu mbështesim zbatimin e plotë të ligjit për dekriminalizimin. Së fundmi, qeveria e SHBA i ka ndaluar hyrjen në Shtetet e Bashkuara disa gjykatësve të korruptuar duke i refuzuar apo anuluar vizën. Ky është vetëm fillimi. Kemi shumë më tepër punë për të bërë për të luftuar korrupsionin. /tesheshi.com/
