Ambasada e Britanisë së Madhe në Kosovë ka njoftuar përmes rrjeteve sociale se sot ka marrë detyrën ambasadori i ri, Nicholas Abbott. Passardhësi i Rouairi O’Connell ka dorëzuar sot në mëngjes kredencialet te presidenti i vendi, Hashim Thaçi.
Pas kësaj ceremonie, ambasadori i ri ka thënë se do të vazhdojë punën e ish-ambasadorit O’Connell për të ndihmuar ata që e luftojnë korrupsionin dhe nepotizmin.
“Jam i lumtur që kam prezantuar Letrën time Kredenciale te Presidenti Thaçi. Mbretëria e Bashkuar dhe Kosova gëzojnë lidhje të thella miqësie dhe bashkëpunimi, të farkëtuara në kohërat më të vështira. Mezi pres të zhvilloj dhe forcojë marrëdhëniet tona me popullin e Kosovës, dhe të vazhdoj punën e paraardhësve të mi për të ndihmuar në reformimin dhe modernizimin e institucioneve, dhe demokracisë së Kosovës, dhe për të inkurajuar dhe mbështetur ata që janë brenda sistemit dhe të cilët po luftojnë korrupsionin dhe nepotizmin”, ka thënë ambasadori i ri i Britanisë së Madhe në Kosovë.
Kujtojmë se ambasadori i mëparshëm, O’Connell, ka qenë zë aktiv kundër politikanëve të korruptuar dhe ka gëzuar simpatinë e kosovarëve bashkë me nofkën “dhëndëri” pasi gruaja e tij është nga Kosova. /tesheshi.com/
