Ambasadori Braathu i shqetësuar: Situatë e brishtë në veri të Kosovës në prag të zgjedhjeve

Përleshjet që ndodhën së fundmi mes përfaqësuesve të partive të minoritetit serb në Leposaviq, konkretisht mes Listës Serbe dhe Partisë së Serbëve të Kosovës që drejtohet nga Aleksandar Jabllanoviq, ka shqetësuar jo pak shefin e misionit të OSBE-së, ambasadori Jan Braathu.

Ai, gjatë vizitës që bëri në Panelin Zgjedhor për Ankesa dhe Parashtresa ku ua dorëzoi formularin e ankesave të alfabetit Brail për personat e verbër, u bëri thirrje të gjitha partive që të respektojnë të drejtën e votës për secilin person.

“Situata është mjaft e brishtë, fatkeqësisht kanë ndodhur disa incidente sidomos në Leposaviq, ju kujtohet që OSBE së bashku me ambasadën amerikane ka lëshuar një deklaratë të përbashkët përmes së cilës iu bëjmë thirrje që të sigurohet një proces fer dhe i drejtë dhe me atë rast kemi dënuar çdo rast të kërcënimit. Fatkeqësisht po shohim shenja që këto kërcënime po vazhdojnë në disa lokalitete. Kërcënimet dhe dhuna nuk kanë fare vend më vendet dhe proceset demokratike. Ne iu bëjmë thirrje të gjitha subjekteve politike që të respektojnë të drejtën e secilit person , të votojnë lirshëm secili person ashtu siç ia merr mendja në mënyrë që të sigurohet vërtet një proces i lirë, i drejtë dhe paqësor zgjedhor. Do të ishte tragjike sikur të cenohej jeta e njeriut në një proces zgjedhor si pasojë e ngritjes së tensioneve”, tha Braathu. /tesheshi.com/