Ambasada e Rusisë në Shqipëri bën të ditur në një njoftim zyrtar se këtë verë në Shqipëri pritet një dyndje e turistëve rusë.
Siç theksohet në njoftim, një numër i madh operatorësh turistikë nga vendi euroaziatik kanë rënë dakord që të sjellin në bregdetin shqiptar një numër të konsiderueshëm, pas braktisjes që i kanë bërë Turqisë.
Por shumë analistë vendas theksojnë se Shqipëria që ofron kryesisht turizëm familjar mund të ketë problem me turistët rusë, të cilët sjellin problem nga konsumimi i madh i alkolit.
Edhe Mali i Zi edhe Rusia i kanë refuzuar kërkesat për një shtesë numri pas vendimit për të mos çuar turistë Turqi, vend i cili ka rregulla më të forta.
Në njoftimin e saj ambasada ruse në Tiranë thekson se “Në përfundim të udhëtimit katërditor (Tiranë-Durrës-Vlorë-Sarandë-Gjirokastër-Berat-Krujë-Tiranë) operatorët rusë u prtitën në një takim nga zv.Ministri i Zhvillimit Ekonomik, Turizmit, Tregtisë dhe Sipërmarrjes, z. Ervin Mete. Gjatë një diskutimi tepër të vlefshëm ku mori pjesë edhe Ambasadori rus në Tiranë, Aleksandër Karpushin, bashkëbiseduesit shkëmbyen pikëpamjet mbi mënyrat e aktivizimit të lidhjeve turistike midis dy vendeve dhe rritjes së fluksit turistik nga Rusia në Shqipëri. Ndër sfidat kryesore u përmendën vendosja e linjës ajrore direkte Moskë-Tiranë, organizimi i një vizite njohëse të gazetarëve rusë në Shqipëri, përmirësimi i infrastrukturës turistike shqiptare, përfshirë këtu krijimin e sistemit të hoteleve “all inclusive”, promovimi i imazhit pozitiv të Shqipërisë në tregun rus, si dhe angazhimi i udhërrëfyesve rusishtfolës në punën me grupe turistike nga Rusia.
Operatorët turistikë rusë “Space Travel” (Moskë), “AVT” (Kazan) dhe “Pegas Tour” (Çelabinsk) dhe përfaqësuesi i kompanisë ajrore Qatar Airëays në Moskë falënderuan palën shqiptare për organizimin e turit dhe shprehën përshtypjet e tyre tejet pozitive nga Shqipëria dhe potenciali i saj turistik, i cili ende mbetet i panjohur për rusët.
Bashkëbiseduesit ndanë bindjen se vizita e agjencive ruse është vetëm hapi i parë në bashkëpunimin e frytshëm midis palëve që ka për qëllim tërheqjen e turistëve rusë në Shqipëri”.
/tesheshi.com/
