Princ saudit, Alwaleed bin Talal, ishte ndër ata dhjetra figura të larta të Saudisë të cilët u paraburgosën në hotel Ritz- Carlton në Riad, si pjesë e një operacioni anti-korrupsion të ndërmarrë nga Princi i Kurorës, Muhamed bin Selman.
Pas muajsh qëndrimi në burgun luksos, ai u lirua në bazë të një marrëveshjeje me qeverinë e vendit të tij, të cilën e ka konfirmuar dhe së fundi në një intervistë për Bloomberg TV. Por detajet e saj nuk pranoi t’i zbulonte.
“Kur them se është një marrëveshje konfidenciale dhe sekrete, një marrëveshje që bazohet në një mirëkuptim të konfirmuar mes meje dhe qeverisë së Arabisë Saudite, unë duhet ta respektoj këtë”, tha figura më e njohur e biznesit në Saudi.
Në mungesë të më shumë informacioneve, spekulimet mbeten ende shfrenuara nëse Princi Alëaleed siguroi lirinë e tij duke humbur pjesën më të madhe të pasurisë së tij, e vlerësuar nga revista Forbes në 17 miliardë dollarë.
Ai i tha Bloomberg se ai do të vazhdonte të investonte në Arabinë Saudite dhe se ai nuk kishte asnjë armiqësi ndaj mbretit të tij, Salman dhe kushëririt të tij, Princit të Kurorës, Muhamed.
Ai shtoi se ishte në diskutime me Fondin e Investimeve Publike i cili kryesohet nga Princi i Kurorës, për të bërë investime të përbashkëta brenda mbretërisë.
Ndër to ai përmendi investimet në NEOM, qytetin e planifikuar prej 500 miliardë dollarësh, në qoshen veriperëndimore të Arabisë Saudite.
Dy vjet më parë, Princi Alwaleed bin Talal ishte dhe në Shqipëri, ku pas një takimi me kryeministrin Rama shprehu ambicien për të investuar në bregdetin shqiptar. /tesheshi.com/
