Tomor Alizoti, kreu i departamentit të të përndjekurve në PD, por që njihet si një diplomati i talentuar, është detyruar të bëjë një sqarim, që në fakt ngjan si një lloj tërheqjeje nga deklarimi në Tonight me Ilva Taren, se Hoyt Yee ndjek politikat e Sorosit.
“…nuk mund ta thotë një vend që është kulmi i demokracisë që mund të hyni në zgjedhje edhe pa opozitën. Kjo do të çojë në krizë. Yee është pjesë e administratës. Ky i përket administratës së vjetër.
Ju nuk e dini që Soros në Shqipëri ka qenë i pozicionuar edhe kundër PD-së? Absolutisht!”, tha Alizoti në emision, ku më pas pyetjes së gazetarës nëse “Yee flet në emër të Sorosit jo administratës amerikane?”, Alizoti iu përgjigj: Janë pjesë të lobit të tyre…
Por pak orë më vonë, Alizoti ka bërë një sqarim, duke thënë se deklarimet e tij janë keqkuptuar:
“Po verej nje keqkuptim ne lidhje me ato qe une kam thene ne programin Tonight ne Ora Neës. Disa media thone se une kam thene qe zevendesndihmes nensekretari i shtetit Brian Hoyt Yee eshte njeri i Sorosit apo mbeshtetes i politikave te Sorosit. Dua te bej te ditur se ajo qe une kam thene eshte se administrata e larte ne ShBA eshte ne tranzicion dhe zoti Hoyt Yee perfaqeson politiken e admnistrates Obama e cila po rezulton problematike ne mjaft kuptime dhe e ndikuar ne disa raste nga Xhorxh Soros. Per cdo keqkuptim te shkaktuar nga ajo qe une kam thene dua te shpreh ndjesen time qe nuk kam qene me qarte dhe nuk kam saktesuar fort vleresimin tim dhe te PD per diplomatin e larte amerikan. Une asnjehere nuk kam etiketuar njerez dhe jo me zyrtare te larte dhe miq te vendit tone si z Hoyt Yee. ShBA do te mbetet partneri dhe frymezimi yne me domethenes sic ka qene deri me tani!”, shkruan Alizoti, që mbahet dhe si një ndër talentet e reja të diplomacisë në radhët e politikës, ku gjuha e qetë dhe e përpunuar është tipar i tij kryesor në ligjërimin analistik.
Dhe mu për këtë arsye deklarimet e tij janë përjetuar keq nga një pjesë e opinionit. Sepse Yee është diplomati i radhës që etikohet si soroist nga zëra afër dhe brenda PD-së, pikërisht nga qëndrimet e tij kundër çadrës. /tesheshi.com/
