Ortekët vranë një grua amerikane dhe një nepaleze dhe dy alpinistë të tjerë mungojnë lart në shpatet e malit tibetian Shishapangma, njoftoi agjencia shtetërore kineze e lajmeve Xinhua.
Shishapangma, pak më e lartë se 8000 metra, është maja e 14-të më e lartë në botë dhe alpinistët e konsiderojnë atë një nga malet më të lehta të asaj lartësie.
Dy ortekë goditën shpatet e tij në lartësinë 7600 dhe 8000 metra dje, më 7 tetor, duke vrarë alpinisten amerikane Anna Guta dhe udhërrëfyesin nepalez Mingmar Sherpa, njoftoi Xinhua sot, 8 tetor.
Një tjetër alpiniste amerikane, Gina Marie Rzucidlo, dhe udhërrëfyesi i saj Nepalez, Tenjen Sherpa, janë të zhdukur, shtoi ajo.
Tenjen Sherpa ishte udhërrëfyesi për Kristin Harilin e Norvegjisë kur ata pushtuan K2 në Pakistan në shtator, duke u bërë alpinistët më të shpejtë në botë që i ngjitën të gjitha 14 majat mbi 8000 metra. Gjithsej 52 alpinistë ishin në rrugën e tyre drejt majës në kohën e ortekut, nga SHBA, Britania e Madhe, Rumania, Shqipëria, Italia, Japonia dhe Pakistani.
Të gjitha aktivitetet e ngjitjes në Shishapangma janë pezulluar për shkak të kushteve të paqëndrueshme të borës. Dy alpinistë pakistanezë i shpëtuan me vështirësi orteqeve të shtunën, më 7 tetor, teksa braktisën përpjekjen e tyre për të arritur majën për shkak të motit të keq, pavarësisht se ishin disa qindra metra larg majës, raportuan mediat pakistaneze.
Nëse njëri prej tyre, Sirbaz Khan, do të kishte arritur majën, ai do të ishte bërë pakistanez i parë që do të ngjitej të 14 majat mbi 8000 metra. Tetori është një muaj popullor për alpinistët në Himalaje për shkak të kushteve tradicionalisht më të qëndrueshme pasi shirat e musonit ulen.
Megjithatë, shkencëtarët paralajmërojnë se ngrohja globale po rrit rrezikun e ortekëve në rajonet me lartësi të madhe, duke përfshirë Himalajet. Javën e kaluar, një ekspeditë kineze ngriti një seri stacionesh moti në Cho Oyu 8201 metra të lartë në kufirin e Tibetit me Nepalin për të matur ndikimin e ndryshimeve klimatike në Himalaje. /tesheshi.com/
