Wayne Rooney i shpëtoi nderin të shtunën Mançester Junajtedit kur shënoi në minutën e 94-t ndaj Stouk Sitit, një gol që solli barazimin 1-1. Një gol që, për më tepër, e bëri atë rekordmenin për golat e shënuar me Mançester Junajtedin.
Rooney la pas të madhin Bobby Charlton, që kishte shënuar 249 në kohën që luante për “djajtë e kuq.”
Përndryshe, rekordi i Rooney-t me 250 gola të shënuar merr të tjera përmasa kur mëson se ato janë realizuar në 546, ndërsa Charlton e kishte arritur thuajse të njëjtën shifër në 758 aktivizime.
Alex Ferguson, ish-trajneri legjendë i Mançester Junajtedit, që tani e ndjek ekipin nga shkallët e stadiumit, mendon se rekordi i Rooney-t është i pathyeshëm.
“Rekordi i Bobby Charlton-it ishte mjaft i qenësishëm. Nuk më shkonte mendja se dikush do ta thyente atë. Eshtë një arritje e jashtëzakonshme,” ka deklaruar Ferguson.
Ish-tekniku e sheh të vështirë që në futbollin e sotëm të ketë lojtar që të qëndrojë dhjetë vite në një skuadër e të arrijë rekorde të tilla.
“Në lojën e ditëve të sotme, është e vështirë që të shohësh ndonjë klub që të ketë lojtarë që të mund qëndrojnë me të për dhjetë vite.”
“Eshtë një objektiv shumë i madh për t’u goditur,” thotë ai për rekordin. /tesheshi.com/
