Shpesh herë në merkaton e futbollit, lëvizja e një klubi apo e një lojtari, krijon një varg lëvizjesh apo strategjish, një tip efekti domino. Kështu ka ndodhur me disa media që mbulojnë ngjarjet sportive, sapo është hedhur “në treg” lajmi se kileni Aleksis Sançez, nuk do të rinovojë kontratën me Arsenalin, e cila skadon verën e ardhëshme.
Por edhe në këtë rast, janë projektuar 2 skenarë, të paktën deri tani. Skenari i parë, është ai që e dërgon Sançez tek Mançester Siti. Në këtë rast, në ekipin e Guardiolës mund të bëhen shumë sulmues, ndaj Serxho Aguerro shihet si lojtar që mund të largohet, nisur edhe nga interesi i disa skuadrave për të. E në një skenar të tillë, Reali i Madridit, por edhe Milan e Bajerni i Mynihut, do të duan të “hapin krahët” për të pritur sulmuesin argjentinas.
Ndërsa në skenarin e dytë, nëse Sançez transferohet te Paris Sen Zhermen, mund të largohen menjëherë 2 lojtarë nga skuadra e kryeqytetit francez. Bëhet fjalë për sulmuesin Kavani, që ndiqet si nga Reali i Madridit, ashtu edhe nga Mancester Junajted e Napoli, si edhe për argjentinasin Di Maria, që ka gjetur treg, nga Anglia, deri në Kinë.
Por këto skenarë, do të duhet të plotësohen edhe nga lëvizjet e Arsenalit, i cili pritet të mbushë hapësirën që mbetet bosh nga Sançez. Në këtë rast, i preferuari i trajnerit Arsen Venger, është sulmuesi francez i krahut, Antoni Marsial.
21 vjecari i Mançester Junajted, gjithnjë e më shumë po e nis ndeshjen nga stoli, e mbase mund të kërkojë ndryshim ambjenti, tashmë që Franca e ka thuajse formalitet, pjesmarrjen në Botërorin e Rusisë në vitin 2018. Kështu e ka futbolli, një hipotezë mund të “ndërtojë” një strategji, por edhe mund të prodhojë një “flluskë dinjitoze sapuni”. /tesheshi.com/
