Pas incidentit me djegien e flamurit kroat nga ana e radikalit Sheshel, janë acaruar me tej raportet e Zagrebit me Beogradin. Shkak kësaj here është bërë një tjetër gojëlëshuar në politikën serbe, ministri i Mbrojtjes, Aleksandër Vulin.
Ky i fundit, duke patur në plan që të shkojë në Kroaci për të përkujtuar një ngjarje nga lufta e pas ’90-ës, ka deklaruar se për vajtjen e tij në këtë vend nuk vendos qeveria e Zagrebit por Vuciçi si komandant suprem i Armatës së Republikës së Serbisë.
Kjo ka acaruar tej mase autoritetet kroate që ia kanë ndaluar menjëherë hyrjen Vulinit në territorin e tyre. Nga ana tjetër, me anë të një note proteste, diplomacia e Zagrebit i kujton Beogradit se “Kroacia është një shtet sovran, një anëtar i Bashkimit Evropian dhe NATO-s, në të cilën hyrja e të huajve është vendosur nga institucionet kompetente kroate, në pajtim me ligjin kroat”.
Më tej thuhet se pas incidentit të 18 prillit, pra djegies së flamurit kroat, “deklarata nga ministri i Mbrojtjes Aleksandar Vulin përbën një provokim shtesë që kontribuon në zhvillimin e marrëdhënieve të fqinjësisë së mirë dhe të plotë respekti reciprok”.
Serbia e Kroacia janë dy shtete me konflikte të trashëguara nga e kaluara, ku paqja, për shkak të nacionalizmave të dyanshëm, por sidomos atij serb, është shumë e brishtë kur arritet. /tesheshi.com
