Kryevetëvendosësi Albin Kurti, pas një heshtjeje të gjatë më në fund ka folur për ikjen Shpend Ahmetit nga partia, i cili më pas ngriti Partinë Socialdemokratike, të cilën edhe e drejton.
Kurti tha se nuk e ka kuptuar ende se përse u largua Ahmeti, dhe se nuk i ka thënë se ka ambicie të bëhet kryetar.
“Shpend Ahmeti doli që nuk ka qenë ndërmjetësues, pasi është bërë kryetar i një partie tjetër. Mua s’më ka thënë asnjëherë se kishte ambicie për t’u bërë kryetar, por e kishte mendjen vetëm te kryeqyteti”, ka deklaruar Kurti në një intervistë për Top Channel.
Por mbetet i bindur se krisja nuk dëmton Vetëvendosjen.
“Nuk ka ndarje të Lëvizjes Vetëvendosje, por dalje të disa personave, të cilët nuk i kanë bërë dëme asaj, por vetes së tyre. Fryma e Vetëvendosjes është ajo që ne mbajmë anëtarësinë tonë. Për mua janë ende enigmatike të gjitha qëllimet e kësaj daljeje nga Lëvizja Vetëvendosje, kur dihet që ne do të jemi qeverisja e ardhshme”, thotë ai.
Kurti sërish ka ngacmuar Partinë Socialdemokrate të Ahmetit duke thënë se në zgjedhjet e reja e vetme nuk mund ta kaloi pragun zgjedhor prej 5 %.
“Sondazhet sot tregojnë se Vetëvendosje del fituese në zgjedhjet e reja, ndërsa partia e re maksimumi do të shkojë dy për qind”, ka thënë Kurti.
Një deklaratë të tillë për sondazhe Kurti e bëri edhe javë më parë ku reaguan socialdemokratët duke thënë se kryevetëvendosësi nuk merr vesh në sondazhe dhe se partia e tyre nuk do e ketë fare problem kalimin e pragut zgjedhor. /tesheshi.com/
