Orë pasi pati një bisedë kokë më kokë më Ramën në Tiranë, kryeministri në pritje i Kosovës Albin Kurti e shpall Ramën si të pastër nga akuzat për mbrojtës të idesë së këmbimit të territoreve, promovuar nga Thaçi e jo nga asnjëherë Rama.
“Kryeministri shqiptar nuk është për shkëmbim territori”, tha Kurti për gazetarët. Për muaj më radhë është aluduar nga një pjesë e politikës dhe medias së Prishtinës, se idenë e këmbimit tërritoreve e mbështet dhe Rama, ndërkohë që ky i fundit publikisht thoshte se nuk mund të mbante asnjë qëndrim përsa kohë që askush nuk e qaste në sqarimin e kësaj teze e as i kërkonte mendim.
Nga ana tjetër, Kurti tha se priste të kishte një erë të re në raportet me qeverinë shqiptare, me të në krye të qeverisë së Kosovës.
“Biseduam për çështje të cilat i kemi të përbashkëta por gjithashtu edhe për çështjet në dy shtetet tona. Duam që edhe në aspektin e politikës së jashtme dhe në aspektin e ekonomisë të bashkërendohen sa më shumë Kosova me Shqipërinë sepse efekti sinergjik që mund të kemi natyrisht që nuk është i shfrytëzuar sa duhet.
Besoj që mundësitë që kemi si qeveri dhe nevojat që kanë qytetarët janë shumë më të mëdha se sa realiteti që e gëzojnë prandaj duam që të krijojmë sa më shumë ura dhe Kosova dhe Shqipëria dhe Shqipëria dhe Kosova t’i ndihmojnë shqiptarët që të mos jenë më të varfrit, e më të papunët e më të nëpërkëmburit jo vetëm në Ballkan”, tha Kurti. /tesheshi./com/
