Kreu i VV Albin Kurti, në një konferencë për shtyp tha se qeveria e Kosovës duhet të angazhohet për mbrojtjen e ish-krerëve të UÇK-ës të cilët po akuzohen nga Specialja në Hagë për krime lufte.
“Në Hagë nuk janë duke u përndjekur vetëm individët, por as nuk mund të mbrohen të pandehurit sikur individë. Shteti i Kosovës duhet të organizojë dhe koordinojë mbrojtjen e të pandehurve. Ata i pamë se i kanë avokatët e tyre secili, por nevojitet bashkërendim nga shteti. UÇK-ja nuk ka qenë e asnjërit, por e të gjithëve dhe të gjithë duhet ta mbrojmë atë”, tha Kurti.
Ish-presidenti i Kosovës Hashim Thaçi, ish-kryetari i PDK-ës Kadri Veseli, deputeti i Vetëvendosjes, Rexhep Selimi dhe ish-kryetari i Kuvendit të Kosovës Jakup Krasniqi, përmes një aktakuze të përbashkët nga Specialja, akuzohen për krime lufte dhe krime kundër njerëzimit.
Kurti tha se pretendimet e Specialjes se ka ekzistuar një ndërmarrje kriminale brenda UÇK-së, nuk janë të vërteta.
“Prokuroria e ka gabim, nuk ka pasur strukturë të tillë, UÇK-ja kishte Shtabin e Përgjithshëm dhe zyrat përkatëse”, tha ai.
Kurti ka qenë kundër themelimit të Gjykatës Speciale nga ana e Kuvendit të Kosovës më 2015, duke votuar kundër. /tesheshi.com/
