Deklarimet e vazhdueshme kohëve të fundit për shkëmbim të territoreve apo korrigjim të kufijve, kryevetëvendosësi Albin Kurti i quan mashtrime të reja.
Sipas tij idetë e tilla më shumë bëhen për t’i dhënë një status special Veriut të Kosovës.
“Arsyeja pse mendojmë se bëhet fjalë për mashtrim të ri është se ideja është në funksion të një lloj krijimi të atmosferës, ku një status special për veriun e Kosovës bëhet më i kollajshëm në emër të një premtimi për kompensim në Preshevë, Medvegjë e Bujanoc, i cili nuk do të ndodhë”, tha Kurti, gjatë një debati me përfaqësuesit e komunave nga Serbia: Preshevë, Medvegjë e Bujanoc, ku u diskutua rreth problemeve të atjeshme dhe zgjidhjeve që mund të priten.
Sipas Kurtit, motivet e palëve në dialogun e Brukselit nuk kanë të bëjnë as me serbët në Kosovë dhe as me shqiptarët në Serbi, porse ndërlidhen me motivet e Beogradit që sa më shpejt të përafrohet me BE-në, kurse për lidershipin e Kosovës që të jetë sa më larg Gjykatës Speciale.
Kujtojmë se presidenti Thaçi pas takoi sot liderët nga Lugina tha se nuk do ketë ndarje të Kosovës dhe se marrëveshja përfundimtare e dialogut do të jetë vetëm mes dy vendeve të pavarura. /tesheshi.com/
