Kryetari i Vetëvendosjes, Albin Kurti gjatë vizitës që po realizon në Saradjevë ka vizituar edhe varrin e ish-presidentit Alija Izetbegoviçit dhe monumentin e 1 mijë e 601 fëmijëve të vrarë.
Me këtë rast, Kurti ka kujtuar edhe gjenocidin që është kryer në këtë qytet por edhe gjenocidin e vitit 1999 që Serbia kreu në Kosovë.
“Te varri i Alija Izetbegovic dhe te monumenti i 1.601 fëmijëve të vrarë në Sarajevë. Gjenocidi në Kosovë i pranverës së vitit 1999, u zbatua nga operacioni ushtarak i Serbisë ‘Patkoi’ i cili i dëboi rreth 860 mijë shqiptarë nga Kosova dhe vrau afër 10 mijë civilë të paarmatosur. Gjenocidi në Sarajevë u zbatua përgjatë gati katër vjetëve, saktësisht 1.425 ditëve, aq sa zgjati rrethimi i hekurt i qytetit. U vranë 11.541 civilë (nga të cilët 1.601 fëmijë) kurse u plagosën a lënduan mbi 50 mijë të tjerë. Për çdo ditë mbi qytet binin mesatarisht 329 granata. Gjatë qëndrimit në Sarajevë bëra nderim dhe vendosa lule të freskëta te varri i kryetarit të parë të B&H, Alija Izetbegovic, dhe te monumenti i fëmijëve sarajevas të vrarë gjatë luftës”, shkruan në Facebook Kurti.
Kujtojmë se Kurti edhe 19 vjet pasluftës nuk ka vizituar asnjëherë varrin e ish-presidentit Ibrahim Rugova për çka jo pak është kritikuar nga LDK-ja. /tesheshi.com/
