Kryeministri Albin Kurti ka përcjellë dy kërkimfalje publike, për dy nga çështjet më sensitive të Kosovës në këto momente; taksën dhe koronavorusin.
Për të parën, bën me dije se projekti i tij i heqjes së taksës pjesërisht nuk mund të zbatohet, e për të dytën thotë se ka bërë një shkelje rregulli.
“Dy kërkimfalje
Të nderuar qytetarë,
Sot, me datë 15 mars 2020, është dashur që të hiqet tarifa 100% në lëndën e parë që importohet nga Serbia. Kjo nuk do të ndodhë sepse qëndrimi im i shprehur më 26 shkurt 2020 ndërkohë nuk u bë vendim. Më vjen keq për këtë. Ende nuk kam arritur ta bind partnerin tonë të koalicionit qeverisës, LDK-në, për atë që vetë jam i bindur: zëvendësimi gradual i tarifës me reciprocitetin është mënyra më e mirë, më e drejtë dhe më e dobishme.
Seanca e djeshme e Kuvendit të Republikës së Kosovës që nisi pasdite e përfundoi pas mesnate, nuk respektoi urdhëresat për distancë fizike mbi një metër midis njerëzve në kohën e pandemisë së virusit Corona. Me zëvendës-kryeministrat e mi tërë kohën isha më afër se aq, e nganjëherë edhe përgjatë bisedave të ndryshme teksa diskutonim mbi buxhetin 2020 të cilin e aprovuam mbrëmë. Më vjen keq për këtë dhe ju kërkoj falje.
Përzemërsisht,
Albin Kurti”, shkruan ky i fundit në një mesazh në FB.
Gjithsesi, ky është i pari rast në historinë politike shqiptare kur një figurë e saj kërkon falje publike. /tesheshi.com/
