Nga të gjitha ndeshjet e luajtura të shtunën, rezultati më befasues ka ardhur nga “Camp Nou”, ku katalanasit humbasin çuditërisht ndaj Alavesit të sapongjitur në kategorinë superiore.
Barcelona humbi 1-2 me Alavesin, në një takim ku askush nuk e mendonte se do të përfundonte kësisoj. Veç kësaj, kjo ishte ndeshja më e dobët e luajtur nga katalanasit në shumë kohë.
Deyverson do t’i kalonte miqtë në epërsi pak para mbarimit të pjesës së parë. Mathieu vë barazpeshën me nisjen e 45 minutave të dyta. Ndërsa Ibai Gomez shënon në të 64-tën minutë për udhëtuesit, duke e rikthyer përfundimisht avantazhin në favor të tyre.
Humbja erdhi për Barcelonën pas katër fitoreve, të arritura pas katër takimeve të interpretuara shkëlqyeshëm. Në Superkupën e Spanjës, Barcelona fiton 0-2 e 3-0 ndaj Seviljes. Në kampionat, shpartallohet Betisi 6-2, si dhe fitohet ngushtësisht, 0-1, në një fushë të vështirë si ajo e Bilbaos.
Po ku u gabua? Pse kjo paraqitje mediokre?
Duke iu referuar sulmit, pikës më të fortë të Barcelonës, në të gjitha takimet pararendëse të fituara, Luis Enrique rreshtoi në sulm një treshe të përbërë nga Arda Turan, Messi e Luis Suarez. Problematik me paraqitjet e tij në fazën e dytë të sezonit të shkuar, Arda Turan shkëlqen me t’u vendosur në pozicionin e tij natyral, në të majtë të sulmit, falë dhe mungesës së Neymar-it.
Tekniku Luis Enrique harroi të zbatonte mbrëmë parimin se formacioni fitues nuk ndërrohet. Zgjodhi të mos ndjekë logjikën, duke hedhur në sulm një treshe të përbërë nga Neymar, Paco Alcacer dhe Arda Turan. Braziliani sapo është kthyer pas një mungese të gjatë, Alcacer e pati të parën paraqitje me Barçën në krye të sulmit, ndërsa Arda Turan u spostua në të djathtë, aty ku ai e ka shumë të vështirë të japë rendiment.
Kur e kuptoi se kishte gabuar, Luis Enrique u mundua të ndreqte diçka, por nuk ia doli. Fajtori është ai për humbjen!
Më së paku, ai nuk duhej ta kishte harruar se Alavesi i rrëmbeu një barazim Atletikos së Madridit në javën e parë! /tesheshi.com/
