Mediat serbe kanë bërë të ditur se vendimi i Gjykatës së Hagës për krime Lufte, I cili e cilësoi të pafajshëm kreun e paramilitarëve serbë, Vojisllav Sheshel, mund të shërbejë si precedent për vendimin e Apelit, ndaj kreut të serbëve të Bosnjës, Radovan Karaxhiq.
Psikiatri që u dënua me 40 vjet burgim për gjenocid ndaj myslimanëve të Bosnjës, ka përgatitur kërkesën për në Apel, pikërisht pasi është zbardhur dispozitivi i hollësishëm i vendimit për Sheshelin.
Televizioni serb B92, thekson se Karaxhiq ishte i tronditur nga vendimi i Gjykatës së Shkallës së Parë dhe e ka përshkruar atë si “improvizim, spekulim dhe më shumë deduksion sesa fakte dhe prova”.
Agjencia franceze e lajmeve AFP, bën të ditur se avokatët e Karaxhiqit kanë dorëzuar sot në Gjykatën e Apelit, kërkesën për të apeluar vendimin e shkallës së parë që u dha në mars. Bën çudi koha e gjatë, por siç njoftojnë mediat serbe, vendimi për Sheshelin shërbeu si spunto dhe precedent procedurial.
Avokati i ish-kreut të serbëve të Bosnjës, Peter Robinson tha se “klienti i tij është një “i dënuar politik dhe akuzat ndaj tij konfirmojnë demonizimin e popullit serb të Bosnjës”. Avokati nuk foli e as llogariti se vetëm në Serebrenicë janë vrarë 8 mijë vetë në mënyrën më çnjerëzore.
Kryetari i Gjykatës së Hagës, Theodor Meron, ka emëruar edhe dhomën e apelit që do të ndjekë procesin.
Kryetari i trupit gjykues është William Hussein Sekule me anëtarë: Vagn Prusse Joensen, Jose Ricardo de Prada Solaesa, dhe Graciela Susana Gatti Santana.
/tesheshi.com/
