Pas Maqedonisë edhe Shqipëria ka rrezik të përfshihet nga përmbytjet deri në ditën e enjte.
Alarmin e ka dhënë kreu i Emergjencave Civile, Shemsi Prençi, i cili tha se në disa zona do të ketë stuhi fragmentare.
“Në gjithë territorin do ketë reshje, por në formë furtunash do të shfaqen në Kukës, Fier, Vlorë dhe në pjesën veri-perëndimore të vendit. Situata mund të rëndohet deri të mërkurën edhe në rajonin e Tiranës dhe Elbasanit. Këto informacione kemi paraprakisht”, deklaroi Prençi për Top Channel.
Kreu i Emergjencave u bëri apel pushuesve të tregohen të kujdesshëm sapo të konstatojnë ndryshimin e motit.
“Në zonën e bregdetit duhet të bëjnë kujdes të gjithë pushuesit, pasi reshjet mund të vijnë në formë shtrëngatash që mund të ngrenë çadrat apo objekte të tjera dhe të dëmtojnë pushuesit”, tha ai.
“Ka pasur dëme të vogla në bujqësi dhe shkëputje të energjisë në rajonin e Kukësit, konkretisht në komunën e Arnit, në Lekbibaj dhe në bashkinë e Kukësit”, deklaroi më tej Prençi.
/tesheshi.com/
