Nga Blendi Gashi
Sistemi i drejtësisë në Kosovë, që nga paslufta, është në gjendje kome të vërtetë ku prokurorët e gjykatësit në vend që të çojnë pas hekurave politikanët që dyshohet se janë të korruptuar, me heshtjen dhe mosveprimin e tyre i mbrojnë ata duke i lënë të lirë të shëtisin rrugëve me vetura super të shtrenjta.
Që prokurorët dhe gjykatësit janë tërësisht të kapur nga politika e tregojnë edhe rastet e fundit ku politikanë të nivelit të lartë, tre ditët e fundit kanë akuzuar njëri-tjetrin për vrasje, shantazhe e vepra korruptive duke terrorizuar kështu popullin, ndërsa si edhe më parë prokuroria vazhdon të mos reagojë.
Bëhet fjalë për akuzat që kanë drejtuar mes njëri-tjetrit zëdhënësi i PDK-së, njëherësh ministri në detyrë i Zhvillimit Ekonomik Blerand Stavileci dhe deputeti i ri i Vetëvendosjes Dardan Molliqaj.
Ky i fundit ka akuzuar kreun e PDK-së Kadri Veselin se në kohën kur ka qenë udhëheqës i SHIK-ut ka dhënë urdhër për qindra vrasje politike, haraç, kërcënime largime nga puna etj.
Kurse Stavileci ka mbrojtur shefin e tij duke e quajtur Molliqajn “koka e sulmit terrorist në drejtim të Kuvendit”.
Këto janë akuza tejet të rënda, aq sa një sistem i vërtetë drejtësie do të çohej në këmbë dhe menjëherë do të thërrhiteshin nga prokuroria për të dhënë dëshmitë e tyre në mënyrë që të nisnin hetimet për vrasjet, shantazhet e të tjerat që përmendin dy politikanë në fjalë.
Në të kundërt, pra nëse do të provohej se nuk ka dëshmi e fakte, si Stavileci ashtu edhe Molliqaj do të përballeshin me drejtësinë për shpifjen e bërë, pasi politikanët, por jo vetëm, duhet të mbajnë përgjegjësinë për deklaratat që bëjnë në mënyrë që të mos terrorizohen një popull i tërë me akuza eventuale të pabaza të cilat mund të bëhen sa për të dëmtuar njëri-tjetrin politikisht.
Ja ç’thonë njohësit e drejtësisë
Njohësit e fushës së drejtësisë thonë se Prokuroria e Shtetit e drejtuar nga Aleksandër Lumezi menjëherë do të duhej të reagonte dhe të merrej me akuzat në fjalë.
Ehat Miftaraj nga Instituti i Kosovës për Drejtësi thotë se në një shtet normal ku sundon ligji, Prokuroria e ka obligim ligjor që në raste të tilla të inicoj procedura sipas detyrës zyrtare.
Miftaraj thotë se zbulimi i vrasjeve politike pas luftës është jo vetëm interes publik, por obligim i shtetit që të zbulojë autorët e këtyre veprave penale dhe drejtësia të vihet në vend.
“Vrasjet poltike cënojnë rëndë rendin kushtetues dhe juridik në Kosovë. Fatkeqësisht, tanimë është dëshmuar se organet e drejtësisë janë të politizuara dhe veprimet apo mosveprimet e tyre janë të sinkronizuara me interesat e politikës.
Në një shtet ligjor, me demokraci të konsoliduar dhe me aktivizëm qytetar, krerët e këtyre institucioneve, e veçanërisht Prokurori i Shtetit nuk do të mund të ndiheshin kaq komod.
Kjo dëshmon integritetin e këtyre institucioneve, pavarësinë e tyre në praktikë dhe lidhjet e tyre me politikën apo nënshtrimin vullnetar të tyre karshi politikës”, thotë Miftaraj për tesheshi.com.
Riza Smaka, njohës i fushës së drejtësisë, thotë se Prokuroria e Shtetit është e detyruar të merret me një çështje, ta hetojë dhe formulojë juridikisht nëse ka elemente për ta ngritur para gjykatës kur denoncohet nga një individ, e lëre nga parti politike.
“Po të isha prokuror, këtë çështje menjëherë do ta kisha proceduar. Mjerisht sistemi i drejtësisë në segmente të caktuara është bllokuar nga oligarkët qeveritarë dhe kjo është dukuri tepër negative.
Kryeprokurori deklaratat anti-korrupsion duhet t’i bëj vepra”, thotë Smaka për tesheshi.com. /tesheshi.com/
