Një nga këngëtarët më të mëdhenj të operës sot, Placido Domingo nuk do të performojë më në Operan Metropolitane të New York-ut, pas akuzave nga disa gra për ngacmim seksual.
Sipas Reuters, si artisti ashtu edhe Metropolitani kanë njoftuar se ai nuk do të performojë më në këtë, një nga shtëpitë më të mëdha të operës në botë.
“Opera Metropolitane konfirmon që Placido Domingo ka pranuar të tërhiqet menjëherë nga të gjitha shfaqjet e ardhshme në Met. Met dhe Z. Domingo kanë rënë dakord që ai të tërhiqet”, thuhet në deklaratë.
Më shumë se 30 këngëtarë, muzikantë, si dhe dhe punonjës të tjerë të shtëpisë së operës kanë konfirmuar javët e fundit se ata kanë qenë dëshmitarë të sjelljes së tij të papërshtatshme ndaj grave gjatë tre dekadave të fundit.
Disa opera dhe orkestra amerikane kanë anuluar shfaqjet nga Domingo, që është njëherësh dhe drejtori artistik i Operas në Los Angeles, por vendimi i Metropolit përfaqëson goditjen më të madhe ndaj këngëtarit deri më sot.
Reuters kujton se qindra gra kanë fajësuar publikisht njerëz të fuqishëm në biznes, politikë, media, sport, art dhe argëtim për ngacmime seksuale dhe abuzim që nga tetori i vitit 2017, falë lëvizjes #MeToo. /tesheshi.com/
