Kreu i PD-së, Lulzim Basha së bashku me dy drejtuesit e tjerë, Arben Ristani dhe Ilir Dervishi, e quajnë “shkelje të ligjit” thirrjen që u ka bërë sot Prokuroria.
Në një letër drejtuar prokurorisë së Tiranës, Basha shpreh gatishmërinë për t’u paraqitur në prokurori nëse kjo e fundit do të zbatonte, sipas tij, duke thënë se në njoftimin e institucionit te pavarur nuk është bërë asnjë shpalosje e fakteve lidhur me pretendimet për lobimin e PD-së në Shtetet e Bashkuara të Amerikës.
Për këtë arsye, Basha i ka kërkuar prokurorisë plotësimin e njoftimit për paraqitje sipas ligjit.
“Ju nuk keni parashtruar në njoftimin tuaj asnjë fakt që ka dalë nga hetimet, duke mos plotësuar detyrimet ligjore”- shprehet në letrën e tij Kryetari i PD, Lulzim Basha.
Ai ka theksuar se “duke kërkuar gatishmërinë time për të zbatuar ligjin, kërkoj nga prokuroria, që të bëjë të njëjtën gjë. Në këto kushte, kërkoj plotësimin e ftesës për paraqitje, siç ju detyron ligji, duke rikonfirmuar gatishmërinë time për t’u paraqitur sipas njoftimit të dërguar nga ana juaj në përputhje me ligjin”. /tesheshi.com/
